საქართველო, შესაძლოა, მარიხუანას ექსპორტიორი ქვეყანა გახდეს - პარლამენტის ფრაქცია „ქართული ოცნება - მწვანეების" თავმჯდომარე გია გაჩეჩილაძე აცხადებს, რომ „ქართული ოცნების" ხელისუფლება, ექსპორტზე გატანის მიზნით, მარიხუანას წარმოების დაწყების საკითხს განიხილავს.

როგორც გაჩეჩილაძემ ჟურნალისტებს უთხრა, საუბარია სამკურნალო მარიხუანაზე, რომლის მოყვანისთვისაც გაიცემა ლიცენზიები, ხოლო ადგილს, სადაც მისი მოყვანა მოხდება, შინაგან საქმეთა სამინისტრო მკაცრად გააკონტროლებს.

გია გაჩეჩილაძე მედიასთან საუბარში აზუსტებს, რომ მმართველი უმრავლესობა საკითხს ვერსიის დონეზე განიხილავს, თუმცა, „შემოვა კანონპროექტი და ყველაფერი იქნება ნათელი".

„მწვანეების" ლიდერი აცხადებს, რომ მარიხუანას ექსპორტის საკითხზე „ქართულმა ოცნებამ" იმსჯელა გუშინ, 10 სექტემბერს პარტიის ცენტრალურ ოფისში გამართულ შეხვედრაზე, რომელსაც პარტიის თავმჯდომარე ბიძინა ივანიშვილიც ესწრებოდა. გაჩეჩილაძის თქმითვე, საკითხზე საუბარი კი, გაცილებით ადრე დაიწყო.

„ვერსიების დონეზე არსებობს ასეთი რამ - შემოვა კანონპროექტი და ყველაფერი იქნება ნათელი. ჩვენ ძალიან გაგვჭედა საკონსტიტუციო სასამართლოს გადაწყვეტილებამ და გვიწევს ახლა ვაკუუმის შევსება, რომელიც მარიხუანასთან არის დაკავშირებული და ძალიან ვამკაცრებთ ყველაფერს. თვითონ რაც მარიხუანას კულტივაციას ეხება, აქ საუბარი იყო იმაზე, რომ შეიძლება ექსპორტზე გატანის თვალსაზრისით - სამკურნალო მარიხუანას მოყვანა იმ თვალსაზრისით, რომ იყოს მხოლოდ ექსპორტისთვის. ის ტერიტორიები, შესაძლებელია ლიცენზიები გაიცეს მარიხუანას მოყვანაზე, იქნება მკაცრად დაცული, უაღრესად მკაცრად დაცული, რაშიც შინაგან საქმეთა სამინისტრო იქნება ჩართული. ეს არის ვერსია", განაცხადა გია გაჩეჩილაძემ.