„გაგიჟდნენ? გადადგნენ ჭკუიდან თუ რა მოუვიდათ?" - ასე ეხმაურება „პატრიოტთა ალიანსის" წევრი ადა მარშანია ინიციატივას, რომელიც ექსპორტირების მიზნით, მარიხუანას წარმოების დაწყებას შეეხება.

„თუ მათი უფროსი ვინც არის, რა ვიცი, მათი უფროსი არის ივანიშვილი, ასე ვიცით ჩვენ. ნუ, ახლა თუ ივანიშვილს აინტერესებს ეს, როგორც ახალი მეთოდი, ბერკეტი და მექანიზმი ახალი ფულის შოვნისა, თუ ამაშია საქმე, თავისთავად ცხადია, ყურმოჭრილი მონა „ქართული ოცნება" ამას დაეთანხმება", განაცხადა ადა მარშანიამ „რუსთვი 2"-თან საუბრისას.

საქართველო, შესაძლოა, მარიხუანას ექსპორტიორი ქვეყანა გახდეს - პარლამენტის ფრაქცია „ქართული ოცნება - მწვანეების" თავმჯდომარე გია გაჩეჩილაძე აცხადებს, რომ „ქართული ოცნების" ხელისუფლება, ექსპორტზე გატანის მიზნით, მარიხუანას წარმოების დაწყების საკითხს განიხილავს.

როგორც გაჩეჩილაძემ ჟურნალისტებს უთხრა, საუბარია სამკურნალო მარიხუანაზე, რომლის მოყვანისთვისაც გაიცემა ლიცენზიები, ხოლო ადგილს, სადაც მისი მოყვანა მოხდება, შინაგან საქმეთა სამინისტრო მკაცრად გააკონტროლებს.

გია გაჩეჩილაძე მედიასთან საუბარში აზუსტებს, რომ მმართველი უმრავლესობა საკითხს ვერსიის დონეზე განიხილავს, თუმცა, „შემოვა კანონპროექტი და ყველაფერი იქნება ნათელი".

„მწვანეების" ლიდერი აცხადებს, რომ მარიხუანას ექსპორტის საკითხზე „ქართულმა ოცნებამ" იმსჯელა გუშინ, 10 სექტემბერს პარტიის ცენტრალურ ოფისში გამართულ შეხვედრაზე, რომელსაც პარტიის თავმჯდომარე ბიძინა ივანიშვილიც ესწრებოდა. გაჩეჩილაძის თქმითვე, საკითხზე საუბარი კი, გაცილებით ადრე დაიწყო.