საქართველოს მესამე პრეზიდენტი, ინიციატივას, რომელიც ექსპორტირების მიზნით, მარიხუანას წარმოების დაწყებას ეხება, სპეციალური ვიდეომიმართვით ეხმაურება.

მიხეილ სააკაშვილი სოციალურ ქსელში რამდენიმე წუთის წინ გავრცელებულ ვიდეომიმართვაში აცხადებს, რომ ბიძინა ივანიშვილს საქართველოს ნარკოჰაბად გადაქცევა სურს.

„მე მინდა მოგიყვეთ ერთი ამბავი. გუშინ, ბიძინა ივანიშვილმა შეკრიბა „ოცნების" პოლიტიკური საბჭო და წევრები ელოდნენ, რომ ის ილაპარაკებდა სალომე ზურაბიშვილზე, მაგრამ ის პირდაპირ გადავიდა საქმეზე. მან მოუწოდა თავის პარტიას, რომ მხარი დაუჭირონ კანონს, რომლის მიხედვითაც, საქართველო ხდება მარიხუანის მწარმოებელი ქვეყანა და მარიხუანა ხდება საქართველოს ერთ-ერთი მთავარი საექსპორტო პროდუქტი.

რას ვამბობდი აბა მე რამდენიმე თვის წინ? რამდენი ჩემი პროგნოზი უნდა აგიხდეთ ასე სრულად. მე ხომ ვამბობდი - ლეგალიზაცია მას სჭირდებოდა იმისთვის, რომ რამდენიმე კვირით ადრე, უჩა მამაცაშვილმა - მისმა დეიდაშვილმა ჩამოიყვანა ამერიკიდან ამის სპეციალისტები და საქართველოში უნდოდათ ნარკოკარტელის გაკეთება და ახლა აკეთებენ კიდევაც. ჩემ დროს საქართველო ხდებოდა რეგიონალური ჰაბი ბიზნესის, კულტურის, განვითარების, ლოგისტიკის, ახალი ტექნოლოგიების. ივანიშვილმა ყველაფერი ეს ჩამოაშორა, საქართველოს ქცევა უნდა ნარკოჰაბად, ნარკოკარტელის ქვეყნად.

მე მინდა ვუთხრა „ოცნების" წევრებს, რომლებიც იყვნენ პოლიტსაბჭოზე და საერთოდ „ოცნების" წევრებს - თქვენც ხომ ქართველები ხართ, ხალხო, შეიძლება პოლიტიკურად არ მოგვწონდეს ერთმანეთი, მაგრამ თქვენც ხომ გიყვართ ეს ქვეყანა? თქვენც ხომ ხვდებით, რომ ივანიშვილი ძალიან დიდ შარში გხვევთ. ჯერ სალომე - საქართველოს მოღალატე და მტერი დაგასვათ კანდიდატად და ახლა ხელს გაწერინებთ წარმოუდგენელ საზიზღრობაზე. ივანიშვილს ეზიზღება საქართველო და უყვარს ფული. ამიტომ, ის საქართველოს პრეზიდენტობის კანდიდატად ასახელებს ზურაბიშვილს და უნდა საქართველოს გადაგვარება, საქართველოს ნარკოტიკების მწარმოებელ და ექსპორტიორ ქვეყნად ქცევა. ნარკოტიკების მაღაზიების ქსელის გაკეთება უნდათ მას, უჩას და მის შვილ ბერას მთელ საქართველოში. ეს არის ფაქტი. ეს არის რეალობა.

იმისთვის, რომ საქართველო გადარჩეს, იმისთვის, რომ საქართველო არ გადაშენდეს, მე მინდა ახლა, რომ ყველანი დავირაზმოთ, ახლა უკვე მნიშვნელობა აღარ აქვს პარტიულ კუთვნილებას. ეს კაცი არის ძალიან დიდი ბოროტება. ამ ბოროტებამ არ უნდა გაიდგას საქართველოში ფესვები. ეს იქნება ყველაზე დიდი სირცხვილი საუკუნოვანი საქართველოსი, თუ ეს კაცი, თუ ეს პითონი, რომელმაც მოაჯადოვა საქართველოს ნაწილი რაღაც პერიოდი, დააჰიპნოზა, თუ ეს ბოროტება გაიდგამს ფესვს საქართველოში, ჩვენ დავრჩებით ქვეყნის გარეშე. ჩვენ აღარ გვექნება სამშობლო. მე სიცოცხლის ფასადაც რომ დამიჯდეს, ამას ბოლომდე შევებრძოლები", განაცხადა სააკაშვილმა რამდენიმეწუთიან ვიდეომიმართვაში.