პარლამენტის ვიცე სპიკერი და „ქართული ოცნების" წევრი გიორგი ვოლსკი რუსეთ-საქართველოს 2008 წლის აგვისტოს ომსა და აღნიშნულთან დაკავშირებით „ქართული ოცნების" მიერ მხარდაჭერილი პრეზიდენტობის კანდიდატის, სალომე ზურაბიშვილის განცხადებას ეხმაურება და აცხადებს, რომ მიხეილ სააკაშვილსა და რუსეთს შორის კონსპირაციული გარიგება მოხდა.

„აქ იყო კონსპირაციული შეთანხმება. ყველა ნიშანი არსებობს იმისა, რომ მოხდა გარკვეული გარიგება კონსპირაციული - „ნაციონალურ მოძრაობაზე" მთლიანად ვერ ვიტყვი, მაგრამ სააკაშვილზე, რომელიც ომის წინა პერიოდში იმყოფებოდა პუტინის საგანგებო წარმომადგენლის რეკომენდაციით იტალიაში და ის ადამიანები მინდა დავასახელო კიდევ, რომლებმაც ომიდან ერთი-ორი ადრე, განსაკუთრებით ხმამაღლა განაცხადეს, რომ რუსეთს დაინტერესება არ აქვს.

ყველამ იცოდა, რომ ცხინვალიდან ხალხი გაყვანილია და ადამიანი, რომელიც ბომბავს იმ პერიოდში ცხინვალს, ასრულებს რუსულ დაკვეთას და ემსახურება რუსეთის ინტერესებს.

რუსეთთან გარიგებაა, როდესაც საქართველომ გადადგა, საქართველომ არა, სააკაშვილმა გადადგა ისეთი ნაბიჯები, რომ საქართველო ჩაეყენებინა უხერხულ მდგომარეობაში.

მიუხედავად ამისა, მე მგონია, რომ ჰააგაშიც და სტრასბურგშიც საკმაოდ მძლავრი პოზიციები გაგვაჩნია იმისთვის, რათა სიმართლე გამოაშკარავდეს. რუსეთი არის აგრესორი და რუსეთი არის ოკუპანტი", განაცხადა გიორგი ვოლსკიმ ჟურნალისტებთან საუბრისას.

სალომე ზურაბიშვილის თქმით, 2008 წელს ხელისუფლების ბრძანებით, საქართველომ თავისი მოსახლეობა დაბომბა.