ქუთაისში, ლადო მესხიშვილის სახელობის სახელმწიფო დრამატულ თეატრში საარჩევნო კამპანიის ფარგლებში მხარდამჭერებთან შეხვედრისას, პრეზიდენტობის დამოუკიდებელმა კანდიდატმა, სალომე ზურაბიშვილმა, რომელსაც „ქართული ოცნება“ სრულ მხარდაჭერას უცხადებს, თქვა, რომ მმართველი პარტიის მიერ მისადმი მხარდაჭერა არა მხოლოდ მისთვისაა მნიშვნელოვანი, არამედ ამას ძალიან დიდი მნიშვნელობა აქვს ქვეყნისა და მისი მომავლისათვის იმ პირობებში, როცა ყველა სახელისუფლებო შტო ერთი პარტიის ხელშია მოქცეულა და ქვეყანა „თავისუფალი, დამოუკიდებელი მესამე ძალის“ გამოჩენას ელოდება, რომელიც ჯერ არ ჩანს.

„ასე შეფასეს ჩვენმა უცხოელმა პარტნიორებმა, რომ ეს გადაწყვეტილება, რომელიც ნიშნავს, რომ მმართველმა პარტიამ გაითვითცნობიერა ის, რომ არ შეიძლება მმართველ პარტიას 21-ე საუკუნეში ჰქონდეს და იკავებდეს ყველა ადგილებს, რაც არსებობს სახელმწიფოში და უნდა დაუთმოს ადგილი, ამ შემთხვევაში, დამოუკიდებელ დეპუტატს, სხვა შემთხვევაში, თუ ეს გახდა, თუ ამის საშუალება მოვიდა ოდესმე, თავისუფალ, დამოუკიდებელ მესამე ძალას, როცა ეს იქნება და ეს ქვეყანა ამას ელის, მაგრამ ჯერ კიდევ არ ჩანს, ჩანს მხოლოდ დესტრუქციული ძალები - და ეს არის წინგადადგმული ნაბიჯი, კონსტრუქციული და დემოკრატიული ჩვენთვის, ყველასთვის“, განაცხადა სალომე ზურაბიშვილმა.

მან აღიარა, რომ „ქართული ოცნების“ მიერ გამოხატული მხარდაჭერის გარეშე, საპრეზიდენტო არჩევნებში მისი გამარჯვების შანსი ნაკლები იქნებოდა

„ვარ ძალიან მადლიერი ბატონო კახა [კალაძე] რომ დღეს ეს [ჩემი მხარდაჭერა] გამოაცხადეთ საჯაროდ, - იმ გადაწყვეტილებისთვის, რომელიც მიღებული იქნა 2 დღის წინ მმართველი პარტიის მიერ. ეს გადაწყვეტილება არის, მე ვიტყოდი, ისტორიული. ცხადია, ჩემთვის არის ძალიან მნიშვნელოვანი. ვიცი მე, ვიყავი კანდიდატი და ვიქნებოდი ბოლომდე საპრეზიდენტო კანდიდატი, მაგრამ ვიცოდი, რომ გამარჯვების შანსი მქონდა ნაკლებად, როგორც სრულიად დამოუკიდებელ კანდიდატს. მაგრამ დღეს ვიცი, რომ მაქვს ძალიან დიდი შანსი იმის გამო, თუ რა გადაწყვეტილება იქნა მიღებული. ნუთუ ეს ნიშნავს, რომ დამოუკიდებელი აღარ ვიქნები?! არ ნიშნავს, რომ დამოუკიდებელი აღარ ვიქნები. ეს ნიშნავს იმას, რომ იმაზე, რაც არის ჩემთვის ყველაზე პრინციპული - წითელ ხაზებზე, რომელზედაც ვერავინ ვერ გადააბიჯებს, ვინც არ უნდა იყოს მმართველი თუ არამმართველი - იმაზე ვიქნები პრინციპული და დამოუკიდებელი. ამავე დროს, ეს იმას ნიშნავს, რომ მე მესმის, რამდენად მნიშვნელოვანი არის ჩენი შედეგებისთვის, რომ ვითანამშრომლოთ. და ეს თანამშრომლობა უნდა დაიწყოს, ადგილზე, რეგიონებიდან და ავიდეს ზემოთ, რამეთუ საქმეზე ორიენტირებული და შედეგიანი იყოს ყველაფერი“, განაცხადა სალომე ზურაბიშვილმა.