„ნაციონალურ მოძრაობის“  წევრი რომან გოცირიძე აცხადებს, რომ ქვეყანა კორუფციის ჭაობშია ჩაძირული. გოცირიძის თქმით, როგორც ჩანს ადგილობრივი ხელისუფლების დანაშაულებრივი საქმიანობა იმდენად მძიმე იყო, რომ მისი გადაფარვა ცენტრალურმა ხელისუფლებამ და სუს-მა ვეღარ შეძლო და ლაშა გოგია თანამდებობიდან სწორედ ამიტომ გადადგა.

„როცა არჩეული პირი თანამდებობას ტოვებს ისე, რომ ერთი წელიც არ არის გასული, ეს იმას ნიშნავს, რომ ძალიან სერიოზული პრობლემაა. კეთილი ინებოს ხელისუფლებამ და მოუყვეს საზოგადოებას თუ რა ხდება. როგორც წესი, საკუთარ კორუმპირებულებს ხელისუფლება და სუს-ი არ სჯის და ყოველთვის უნდათ გადაფარონ, მაგრამ იკვეთება, რომ იმდენად რეზონანსული და სერიოზული საქმეა ეს ნაცადი ხერხი არ გამოვა და იძულებული არიან წავიდნენ ამ ნაბიჯზე და გადააყენონ. საზოგადოებამ, უნდა იცოდეს თუ რას ჩადის „ქართული ოცნების“ მიერ დანიშნული მათი დახმარებით არჩეული ადამიანი და როგორი კორუფციის ჭაობში ჩავარდა ქვეყანა“, აცხადებს რომან გოცირიძე.