ვანისა და ბაღდათის მიტროპოლიტი მეუფე ანტონი, მთავრობის ახალ საკანონმდებლო ინიციატივაზე, რომელიც სამედიცინო მიზნით მარიხუანას საექსპორტოდ წარმოების დაწყებას გულისხმობს, აცხადებს, რომ „ეკლესია შეშფოთებულია".

მეუფე იმედოვნებს, რომ ხელისუფლება აღნიშნულთან დაკავშირებით, სწორ გადაწყვეტილებას მიიღებს, წინააღმდეგ შემთხვევაში, როგორც მიტროპოლიტი აცხადებს, „ასე არ გავჩერდებით, რაღაც ჩვენს სიტყვას ვიტყვით". 

„მე იუმორში ვიტყვი, რომ იქნება სანთლების რევოლუცია - დავანთებთ სანთლებს და შევევედრებით უფალს და უფალი გვიჩვენებს რა, როგორ და რანაირად.... მე არ მჯერა, რომ რაღაცნაირად ხალხის წინააღმდეგ წავლენ.... ხელისუფლებაში ნამდვილად არიან ისეთი ადამიანები, რომლებიც შედეგს თვითონ ხედავენ", აცხადებს მეუფე ანტონი, რომელიც მარიხუანას კულტივაციასთან დაკავშირებით საპარლმანეტო უმრავლესობის წევრის, გუგული მაღრაძის განცხადებასაც გამოეხმაურა.

„გუგული მაღრაძე, მე ვფიქრობ, სიზმარსა და ცხადს ვერ არჩევს ერთმანეთისგან და ამიტომ, რაღაცნაირად საუბარიც არ მინდა. ალბათ, სიზმარსა და ცხადს როცა გაარჩევს ერთმანეთისგან, მაშინ შეიძლება, რომ მის კომენტარებს მისცე შეფასება", განაცხადა მეუფემ „TV პირველის" ეთერში.

დეპუტატი გუგული მაღრაძე აცხადებს, რომ მარიხუანის მოყვანა და გატანა საზღვარგარეთ ქვეყნისთვის მოგებას მოიტანს.

„უცხოეთში გასატანი არა გვაქვს არაფერი ბევრი, იმიტომ, რომ ძალიან რთულია. მაგრამ, იცით, ახლა უკვე რამხელა შეჯიბრია ქვეყნებს შორის, ვინ გაიტანს ამ პროდუქტს უცხოეთში? სოფლის მეურნეობის კულტურაა და სოფლის მეურნეობა ჩვენთან განვითარებულია. სადღაც მოიყვანენ სიმინდს, ლობიოს და ჟოლოს და სადღაც მოიყვანენ ვთქვათ, ამას [მარიხუანას]. ეს იქნება ლიცენზირებული. ეს იქნება გათვლილი იმაზე, რომ მოიტანოს მეტი მოგება ქვეყნისთვის“, განაცხადა გუგული მაღრაძემ.