სამეგრელო-ზემო სვანეთის ყოფილ გუბერნატორს, ლევან შონიას „ერთიანი ნაციონალური მოძრაობის“ რეგიონული ორგანიზაციის ლიდერების, მურთაზ ზოდელავას და ანი წითლიძის წინააღმდეგ სარჩელი სასამართლოში აქვს შეტანილი „იმ ცილისწამებისთვის“, რასაც ისინი მის მიმართ ავრცელებდნენ და სასამართლოს სამართლიან განაჩენს ელოდება.

„კონტრაბანდის საქმეზე“ მისი სისხლის სამართლებრივი პასუხისმგებლობის საკითხის შესაძლო დაყენების თაობაზე დასმული შეკითხვის საპასუხოდ, ლევან შონიამ GUARDIAN.GE-ის განუცხადა, რომ მას სამი წელი „ჯიჯგნიდნენ“ იმის გამო, რომ „კანონი არანაირად ჩინოსანს არ იცავს“.

„მე ზოდელავას, წითლიძის და ა.შ. შემთხვევაში, ბევრი ვითმინე ასეთი ცილისწამება. „ქარხნები აფხაზეთში“ და ა.შ. ჯერ ერთი ჩემი ბიოგრაფია კარგად რომ შეისწავლონ, ნახავდნენ მანდ, რომ მე აფხაზეთში ისედაც არ შემესვლება - მე იქ ბევრი რამე დავკარგე - მშობელი, ძმა და ა.შ. სამი წელი მჯიჯგნიდნენ, პირდაპირ გეტყვით - ოჯახს ეხებოდნენ, ჩემს წასულ მშობელს ეხენოდნენ. ეს იმის გამო, რომ კანონი არანაირად ჩინოსანს არ იცავს. ენას ძვალი არ აქვსო და რასაც მინდა, იმას ვიტყვიო. მე სასამართლოში შეტანილი მაქვს ზოდელავას და წითლიძის მიმართ, ყველა იმ ცილისწამებაზე საჩივარი, აგერ არის სასამართლო და დაადგენს“, განაცხადა შონიამ.