საქართველოს პრეზიდენტობის კანდიდატი ოპოზიციური პარტიების გაერთიანებიდან „ძალა ერთობაშია“ გრიგოლ ვაშაძე, ტელეკომპანია „იბერიას“ საქმეზე ახალი ფარული აუდიოჩანაწერის გავრცელებას ეხმაურება. 

გრიგოლ ვაშაძის განცხადებით, დღევანდელი ხელისუფლება „კორუმპირებულია“ და მიზანს მეტი მოგების ნახვა წარმოადგენს. ვაშაძე ასევე ამბობს, რომ ხელისუფლებას თავისუფალი მედიის გაქრობა სურს.

„ეს არის ძირგამომპალი, კორუმპირებული რეჟიმი, რომლის ერთადერთი მიზანი, მიზეზი და არსებობის საფუძველი არის, რაც შეიძლება მეტი ფული ამოიღონ საქართველოს გადასახადის გადამხდელის ჯიბიდან, ჩაიდოს თავის ჯიბეში და ჩალაგებული ჩემოდნებით დაელოდონ, როდის მოუწევთ ამ ქვეყნიდან გაქცევა. არანაირმა იდეოლოგიურმა, პოლიტიკურმა, პიროვნულმა განსხვავებებმა, კამათმა და დავამ ყველას ჩვენ არ უნდა შეგვიშალოს ხელი ამ ტელევიზიის გარშემო დავდგეთ, რადგან თუ  საშუალებას მივცემთ თავისუფალი სიტყვა მოვსპოთ ამ ქვეყანაში, ჟურნალისტებს ალიკაპი გაუკეთონ და მოსწყვიტონ თავისუფალ ეთერს მაშინ ოპოზიციის კი არა, მოქალაქის ჩურჩულს ვერ გაიგებენ, ვერც საქართველოში და ვერც ფარგლებს გარეთ“, განაცხადა გრიგოლ ვაშაძემ.