გადავხედე და თურმე კახეთში ყველაფერი იმ კაცის დროს გაკეთდა, რომლის ოპოზიციაშიც ვიყავი ცხრა წლის განმავლობაში, - განაცხადა „ძალა ერთობაშია“-ს საპრეზიდენტო კანდიდატის მხარდამჭერმა თაკო ჩარკვიანმა თელავში, სადაც გრიგოლ ვაშაძემ ამომრჩევლებთან შეხვედრა გამართა.

„რატომ ამოვარჩიე გრიგოლ ვაშაძე – საქართველო უნიჭიერესია, მაგრამ ამ ბრძოლებში, რაღაცნაირად პროფესიონალიზმის რაოდენობრივად სიმწირე შეიქმნა. საქართველოში ჩვენ გვყავს მაღალი რანგის პროფესიონალი, რომელსაც უკვე გაჭრილი აქვს დასავლური გზა და მან ეს დაამტკიცა. ამის მოწმე გავხდი 2008 წლის 8 აგვისტოს პერიოდში, როდესაც პრაქტიკულად, გრიგოლ ვაშაძის მხრებზე გადაირა ზუსტად იმან, რომ მთელს მსოფლიოს შეეტყო – საქართველომ კი არ დაიწყო ომი, არამედ საქართველოს ტერიტორიაზე უცხო ქვეყანა შემოიჭრა.

გადავხედე და თურმე კახეთში ყველაფერი იმ კაცის დროს გაკეთდა, რომლის ოპოზიციაშიც ვიყავი ცხრა წლის განმავლობაში. გარდამტეხი მაშინ იყო სანდრო გირგვლიანის თემა. მაშინ გვერდით ვედექი ირინა ენუქიძეს და რა მოხდა, მე მაშინ ვიცავდი შვილმკვდარ დედას, დღეს ვიცავ შვილმკვდარ მამებს“, განაცხადა თაკო ჩარკვიანმა, რომლის სიტყვების ციტირებასაც „საზოგადოებრივი მაუწყებელი“ ავრცელებს.

პუბლიცისტმა თქვა, რომ გრიგოლ ვაშაძეს ენდობა და დარწმუნებულია, რომ იგი საუკეთესო თვისებებს წამოიღებს „ნაციონალური მოძრაობიდან“.

„გრიგოლ ვაშაძეს დიდი ხანია ვიცნობ და მას ვენდობი, როგორც პიროვნებას. ჩვენ, გაერთიანებულმა ოპოზიციამ ამოვარჩიეთ ის პიროვნება, რომელიც საუკეთესო თვისებებს წამოიღებს „ნაციონალური მოძრაობიდან“ და ეს იყო მაღალი პროფესიონალიზმი, სახელმწიფო ინსტიტუციების შექმნა, კულტურის პატივისცემა, პატივისცემა თაობების და ამის დასტური ვარ, რადგან მან ცხრაწლიანი პერიოდის დროს, სრულიად ინდივიდუალურად გადაწყვიტა და ქართველ მწერლებს წართმეული მწერალთა სახლი დაუბრუნა“, აღნიშნა ჩარკვიანმა.