„ევროპული საქართველოს“ წევრი ირმა ნადირაშვილი „ქართული ოცნების“ მიერ კანაფის კულტივაცია/ექსპორტის შესახებ კანონპროექტის შეჩერებას და მის შესაძლო გაწვევას ეხმაურება. 

ნადირაშვილის თქმით, ეს ხელისუფლება არ ფიქრობს მისი ნაბიჯების შედეგებზე და ურჩევს მათ, რომ ჯერ შედეგებზე იფიქრონ და ნაბიჯები ისე გადადგან.

„ეკლესია მაშინაც არსებობდა, როდესაც ეს კანონპროექტი შემოიტანეს და მათ ეს იცოდნენ, ამ ინსტიტუტის არსებობს შესახებ, იცოდნენ ოპოზიციის არსებობის შესახებ. ხელისუფლებაში როდესაც ხარ, ვალდებული ხარ, რომ ამ ყველაფერზე იფიქრო, მას რა რეაქცია მოჰყვება. ამ მთავრობის უბედურება ის არის, რომ ისინი ჯერ აკეთებენ რაღაცას და მხოლოდ შემდეგ იწყებენ ფიქრს, რა შეიძლება მოჰყვეს მათ მიერ გადადგმულ ნაბიჯებს. ჩვენი რჩევაა, რომ ჯერ იფიქრონ და მერე გააკეთონ საქმე, სანამ ხელისუფლებაში არიან, შესაბამისად, ისეთ სამარცხვინო ვითარებაში, როგორშიც ახლა აღმოჩნდნენ, არ აღმოჩნდებიან, როდესაც დაჩქარებული წესით შემოტანილი კანონპროექტის უკან გატანა უწევთ“, განაცხადა ირმა ნადირაშვილმა.