„პანკისობა 2018“ დღეს აღარ გაიმართება. პანკისობის დღესასწაულთან დაკავშირებით დაგეგმილი ღონისძიებები მას შემდეგ გაუქმდა, რაც პანკისში სპეცოპერაციისას მოკლული თემირლან მაჩალიკაშვილის მამამ, მალხაზ მაჩალიკაშვილმა ადგილობრივებს დაშლისკენ მოუწოდა.

მაჩალიკაშვილმა მოსახლეობას, რომელიც ღონისძიებების გამართვის ადგილას, ამფითეატრში მივიდა, უთხრა, რომ აღნიშნულ ტერიტორიაზე დღესასწაულის აღნიშვნა არასწორია, რადგან ამ ადგილთან ახლოს მისი შვილია დასაფლავებული.

„პანკისობა არანაირი ტრადიციული დღესასწაული არ არის და არც ყოფილა. რაც შეეხება დღევანდელ დღეს, დღეს არც ჩატარდება. თუნდაც ტრადიციული ყოფილიყო და ორ საუკუნეს ითვლიდეს. აქედან ორ მეტრში წევს დახვრეტილი მძინარე ბავშვი და დღეს მოვიდნენ მის ძვლებზე და სისხლზე სათამაშოდ. თუ ამდენი ადამიანობა გაქვთ, დამიდექით გვერდით, დაისაჯონ ის ნაძირლები, რომ მეც დამასვენონ, ჩემი შვილიც საფლავში დაასვენონ და საქართველომაც დაისვენოს. დასაჯონ გომელაური, დაისაჯოს გახარია, დაისაჯონ დამნაშავე სპეცრაზმელები", განაცხადა მაჩალიკაშვილმა სოფელ დუისის სასაფლაოსთან გამართულ აქციაზე, სადაც თემირლან მაჩალიკაშვილის ახლობლები პანკისობასთან დაკავშირებით დაგეგმილი ღონისძიების გაუქმებას ითხოვდნენ.

აქციაზე ინციდენტიც მოხდა - მსუბუქი ავტმანქანა რამდენიმე ბავშვს და ქალს დაეჯახა, რის შედეგადაც მათ მსუბუქი დაზიანებები მიიღეს. დაშავებულებს სასწრაფო სამედიცინო დახმარების ჯგუფმა პირველადი დახმარება ადგილზე აღმოუჩინა.

ამ დროისთვის ადილობრივები ტორიტორიას ტოვებენ.