თავდაცვის ინსტიტუციური აღმშენებლობის სკოლაში „შეიარაღებული კონფლიქტის დროს კულტურულ ფასეულობათა დაცვის“ ტრენინგი დაიწყო. UNESCO-სა და საქართველოს თავდაცვის სამინისტროს ორგანიზებითა და საქართველოს იუნესკოს საქმეთა ეროვნული კომისიის თანადგომით მიმდინარე ორდღიან სემინარში თავდაცვისა და საგარეო საქმეთა სამინისტროების, საქართველოს კულტურული მემკვიდრეობის დაცვის ეროვნული სააგენტოსა და დიდი მცხეთის სახელმწიფო არქეოლოგიური მუზეუმის წარმომადგენლები მონაწილეობენ. კურსს UNESCO-ს ტრენერები, „ლურჯი ფარის საერთაშორისო კომიტეტისა“ და წითელი ჯვრის საერთაშორისო კომიტეტის საერთაშორისო და ადგილობრივი ექსპერტები უძღვებიან.

ტრენინგის ფარგლებში მონაწილეები გადაუდებელ ვითარებაში ძეგლების დაცვის უზრუნველსაყოფად პროფესიულ ცოდნასა და უნარებს გაიუმჯობესებენ, შეიარაღებული კონფლიქტის დროს კულტურულ ფასეულობათა დაცვისთვის სათანადო სპეციალურ მანიშნებსა და საგანგებო ვითარებაში სამხედრო-სამოქალაქო თანამშრომლობის საკითხებზეც იმსჯელებენ.

შეიარაღებული კონფლიქტების დროს კულტურული ძეგლების დაცვა ეროვნულ დონეზე განსახორციელებელი ნაკისრ ამოცანას წარმოადგენს. 2016 წელს, შეიარაღებული კონფლიქტის დროს კულტურულ ფასეულობათა დაცვის ჰააგის კომიტეტმა მსოფლიო მემკვიდრეობის „მცხეთის ისტორიულ ძეგლებს“ „გაძლიერებული დაცვის ქვეშ მყოფი ძეგლის“ სტატუსი მიანიჭა, რაც ჩვენი ქვეყნის უმთავრეს საგანძურს დამატებითი დაცვის რეჟიმს უდგენს.

ინფორმაციას თავდაცვის სამინისტროს პრესსამსახური ავრცელებს.