(GUARDIAN.GE) - პაატა ბურჭულაძემ განაცხადა, რომ 2012 წელს ის ბიძინა ივანიშვილს ემხრობოდა და უნდოდა, რომ „ნაციონალური მოძრაობის“ მმართველობა შეცვლილიყო, თუმცა მათი გზები მალე გაიყარა. ამის შესახებ მსოფლიო ბანმა „რუსთავი 2“-ის ეთერში, გადაცემა „არჩევანში“ განაცხადა.

პაატა ბურჭულაძემ გაიხსენა თუ როგორ შესთავაზა ივანიშვილმა მას 2012 წელს პრეზიდენტობა და როგორ უთხრა მან ამაზე უარი. ბურჭულაძემ აღნიშნა, რომ ივანიშვილმა ერთ-ერთი შეხვედრის დროს მას დიდი ოდენობით თანხაც შესთავაზა და ხაზი გაუსვა, რომ კახა კალაძეს უკვე მისცა 8 მილიონი.

„პირველად ივანიშვილს 2012 წლის იანვარში დედაჩემის პანაშვიდზე შევხვდი, უცებ შეჩერდა მთელი მოძრაობა პანაშვიდზე და შემობრძანდა ბატონი ბიძინა, მოვიდა მომისამძიმრა. მე ძალიან მესიამოვნა მისი გაცნობა, ეს იყო ჩვენი გაცნობის დღე, იმდენად მესიამოვნა რომ მართლა ვთხოვე ორი წუთი დარჩენილიყო და მადლობები ვუხადე, იმიტომ რომ მე ქედს ვიხრიდი ამ ადამიანის წინაშე, მადლობა გადავუხადე იმ გაწეული საქმეებისთვის, რაც მან გააკეთა ქართველი ინტელიგენციისთვის და ეს იყო ჩვენი პირველი შეხვედრა.

2012-ში ვიყავი ივანიშვილის მხარდამჭერი, იმიტომ რომ მინდოდა შეცვლილიყო „ნაციონალური მოძრაობა“იმ დროისთვის, იმიტომ რომ გარდა იმისა რაც კარგი გააკეთეს, იქ ძალიან ბევრი რამ იყო, უმთავრესად სამართლებრივი საქმეები.

მესამე შეხვედრა იყო პატრიარქის, ჩვენი უწმინდესის საღამო პარიზში, სადაც 200 კაცი აქედან წავიდა გუნდი, ორკესტრი და მან გამოთქვა სურვილი, რომ ყოფილიყო ამის დამფინანსებელი, რაზეც გვქონდა შეხვედრა და ამ შეხვედრაზე დავიწყეთ ჩვენ უკვე პოლიტიკური ლაპარაკი და აქ იყო საუბარი და მითხრა, რომ შენ პრეზიდენტი იყავიო და მეო პრემიერ მინისტრიო. მე ვუთხარი, რომ ბატონო ბიძინა, მე დიდი პატივისცემით გეპყრობით და რა თქმა უნდა, ეს ძალიან დიდი მდგომარეობაა - პრეზიდენტობა, მაგრამ მე მაქვს ჩემი კარიერა, მე მაქვს ჩემი სპექტაკლები, ძალიან მაღალანაზღაურებადი, არის ძალიან კარგი და მე უარი ვუთხარი. პირველი ზარი, რამაც ჩემში აღშფოთება გამოიწვია იყო ის, რომ მითხრა „უი ფინანსებზე თუ არიო“, მე ვუთხარი არა-მეთქი, ‘ბიჭო ფინანსებზე თუ არის პრობლება, აი მე კახი კალაძეს 8 მილიონი მივეციო ბანკისთვისო და აი კახი კარგად არის’- ასე მითხრა ივანიშვილმა. რაც შეეხება კახის, მე მას პატივს ვცემ, „ოცნებაში“ კახის მსგავსად არის ადამიანების ნაწილი, რომლებსაც შეუძლიათ ადამიანურად გამოვიდნენ იქიდან.

ის [ივანიშვილი] ადამიანი ყველა ადამიანს აფასებს ლარში და დოლარში. იყო საკმაოდ დიდი თანხა შემოთავაზებული და მე უარი ვუთხარი... ძალიან დიდი თანხა იყო, ძალიან... მილიონები... მისთვის წარმოუდგენელია, რომ ვიღაცამ უარი უთხრას. როდესაც მან უარი მიიღო, მერე ივანიშვილმა ჩემ მეგობრებთან თქვა, რომ ბურჭულაძე მთხოვდა 50 მილიონსო. ჩემსა და ივანიშვილს შორის დღეს არაფერი საერთო არ არის“, განაცხადა პაატა ბურჭულაძემ.