პარლამენტის თავმჯდომარე ირაკლი კობახიძე აცხადებს, რომ ფარული აუდიოჩანაწერები „ქართული ოცნებისთვის“ მძიმე სკანდალი არ არის, რადგან „ომეგა ჯგუფის“ დამფუძნებელი ელაპარაკება ისეთ პირებს, რომლებსაც დღეს შეხება „ქართულ ოცნებასთან“ არ აქვთ.

„მუდმივად ვხედავთ ჩანაწერებს, სადაც საუბრობს 2 ადამიანი, რომლებსაც „ქართულ ოცნებასთან“ არანაირი შეხება არ აქვს. რანაირად არის ეს ჩვენთვის მძიმე სკანდალი - ოქუაშვილი ელაპარაკება ვიღაცებს, ხან ერთს, ხან მეორეს, ხან მესამეს, რომელთაგან არც ერთს არ აქვს შეხება „ქართულ ოცნებასთან“.

ლევან ყიფიანის მინისტრობის შემდეგ რამდენი წელი გავიდა და არანაირი შეხება მას აღარ აქვს ქართულ ოცნებასთან. რანაირი სკანდალია ეს ჩვენთვის. პირიქით, ჩვენ ვართ დაინტერესებული მაქსიმალურად, რომ გამოიძიონ ეს საქმე, როცა ლაპარაკობს ოქუაშვილი, ის პრაქტიკულად თავის დანაშაულზე საუბრობს, გავარკვიოთ რა დანაშაული ჩაუდენია ოქუაშვილს, როცა ფულს უხდიდა ვიღაცას. ოქუაშვილიც უნდა დავიჭიროთ, პეტრეც და პავლეც, თუ ისინი არიან დანაშაულის თანამონაწილეები“, აცხადებს, ირაკლი კობახიძე.