თერჯოლის მუნიციპალიტეტის მერის პირველი მოადგილე მანუჩარ ფანჩულიძე, მერიის განათლების, კულტურის, სპორტისა და ახალგაზრდულ საქმეთა სამსახურის უფროსი გურამ თურქაძე და ა(ა)იპ სახელოვნებო განათლების, კულტურისა და ტურიზმის განყოფილების უფროსი გიგა კუბლაშვილი უნაგირას მთაზე იმყოფებოდნენ, სადაც ახლახან უძველესი ქრისტიანული ტაძრის სარესტავრაციო სამუშაოები დაიწყო.

უნაგირას მთა ორი მუნიციპალიტეტის - თერჯოლისა და ტყიბულის, კერძოდ სოფლების: სიმონეთის, ნახშირღელის, სეფარეთისა და ცუცხვათის საზღვარზე მდებარეობს. უნაგირას მთის მარჯვენა მწვერვალზე არსებული უძველესი ქრისტიანული ტაძარი-გალავნითა და მიშენებებით, წმინდა გიორგის სახელობისაა და სავარაუდოდ შუა საუკუნეებს, X-XI სს განეკუთვნება. ამ პერიოდის შეიძლება იყოს ეკლესიის ცენტრალური ნაწილი, საძირკველი კი, შესაძლებელია, უფრო ადრინდელ V-VI საუკუნეებს განეკუთვნებოდეს. სწორედ ამიტომ ეს ტაძარი მკვლევარებისა და სპეციალისტების დიდ ინტერესს იწვევს. ამჟამად მიმდინარე რესტავრაციის 1-ლი ეტაპის-გაწმენდითი სამუშაოების პარალელურად მიმდინარეობს შესწავლითი სამუშაოები. ტაძრის ცენტრალური ნაწილის აღდგენა წელს მოხდება ფონდ „ქართუს“ მიერ.

„მუნიციპალიტეტის ტურისტული პოტენციალისა და ცნობადობის განვითარებას დიდი ყურადღება ეთმობა ადგილობრივი ხელისუფლების მხრიდან. ამის დადასტურებაა ტურისტულ ლოკაციებზე ჩატარებული არაერთი კულტურული ღონისძიება თუ სარესტავრაციო სამუშაოები. მოხარული ვარ, რომ სამუშაოები უნაგირას მთაზე მდებარე ეკლესიაშიც დაიწყო, აღდგენისა და პარალელურად შესწავლის მიზნით, რაც თერჯოლა-ტყიბულის ტურისტული პოტენციალის განვითარებას კიდევ უფრო შეუწყობს ხელს. თერჯოლის მუნიციპალიტეტის მერიის თანამშრომლები არაერთხელ შემოვუერთდებით აქ მომუშავე კოლექტივს, რათა ჩვენი წვლილი შევიტანოთ ამ მამულიშვილურ საქმეში“, აღნიშნა მანუჩარ ფანჩულიძემ.

ინფორმაციას თერჯოლის მერიის პრესსამსახური ავრცელებს.