პარლამენტის თავმჯდომარის პირველმა მოადგილემ, თამარ ჩუგოშვილმა საზოგადოებრივი მაუწყებლის გადაცემაში „კვირის ინტერვიუ“ განაცხადა, რომ გამოძიების შედეგებს ტელეკომპანია „იბერიის“ და „ომეგა ჯგუფის“ მფლობელებზე მეტად ნამდვილად ელოდება.

მისი თქმით, ჯერ რაც ვიცით და ყველამ ერთად მოვისმინეთ, რამდენიმე ადამიანის სატელეფონო საუბარია და კარგად არის გასარკვევი, რეალურად რასთან გვაქვს საქმე, რადგან შესაძლოა, სხვადასხვა სცენარები იყოს.

„ყველაზე მეტად შედეგების დადება ჩვენ გვეჩქარება, რადგან ჩვენ გარდა ჩირქი არავის ეცხება. გვაქვს განცდა, რომ შეიძლება, ეს ყველაფერი ცოტა უსამართლო იყოს, შესაძლოა, სკანდალურიც. ეს არ ვიცი, მაგრამ ჩვენ სამართლებრივ სახელმწიფოში ვცხოვრობთ. ამიტომ, წინასწარ ვერაფერს ვიტყვით, სანამ კომპეტენტური ორგანოები არ იტყვიან.

გამოძიების ნაცვლად ამას ვერავინ დაადგენს. ჩვენ ხშირად ვყოფილვართ ისეთ მდგომარეობაში, როცა ლაფს ისვრიან და მერე რაღაცები სხვანაირად ირკვევა ხოლმე. ეს ბევრჯერ გაგვივლია და ბევრჯერ გამოგვიცდია. სამწუხაროდ, მერე რომ გაირკვევა, ჩაიკარგება ხოლმე და საზოგადოებას ძალიან მძიმე განცდები რჩება“, განაცხადა ჩუგოშვილმა.