გაერთიანებული ოპოზიცია „ძალა ერთობაშია“ ახალქალაქის N40 საოლქო საარჩევნო კომისიის თავმჯდომარეს, ჰასმიკ მარანგოზიანს მათი წარმომადგენლების მიმართ განხორციელებულ ძალადობაში ადანაშაულებს.

განაცხადება ამის შესახებ რამდენიმე წუთის წინ გამართულ ბრიფინგზე „ერთიანი ნაციოანალური მოძრაობის" პოლიტსაბჭოს წევრმა, ლევან ბეჟაშვილმა გააკეთა.

ბეჭაშვილის თქმით, „ძალა ერთობაშია"-ს წარმომადგენლებს, თეონა ჭალიძეს და არტურ მკოიანს ჰასმიკ მარანგოზიანმა ფიზიკური და სიტყვიერი შეურაცხყოფა მიაყენა.

„დღევანდელი საგანგებო ბრიფინზგი გვინდა მივუძღვნათ საარჩევნო ადმინისტრაციის მხრიდან მორიგ უკანონობას, მაგრამ ამ უკანონობასაც თავისი საზღვარი აქვს. ჩვენ ვხედავთ, რომ საარჩევნო ადმინისტრაცის საოლქო საარჩევნო კომისიის თავმჯდომარეები პირდაპირ აგრესიაზე, პირდაპირ ძალადობაზე გადადიან ჩვენი წევრების მიიმართ. დღეს გვინდა ვისაუბროთ ახალქალაქის საოლქო საარჩევნო კომისიაზე....

ხელისუფლება რატომღაც ამ რეგიონს განიხილავს, რატომღაც თავის საარჩევნო ყულაბად, სადაც შეუძლია გაყალბების, ძალადობის, სპეცსამსახურების მეშვეობით თავისი საარჩევნო ყულაბა გაავსოს. ამიტომ, ჩვენი განსაკუთრებული ყურადღების და მიზანდასახულობის ობიექტი იქნება ახალქალაქის და ნინოწმინდის საოლქო საარჩევნო კომისია და სწორედ ამიტომ, გავაგზავნეთ საოლქო საარჩევნო კომისიებში ისეთი პროფესიონალი ადამიანები, რომლებსაც აქვთ საარჩევნო გამოცდილება და რომლებიც წინ აღუდგებიან იმ დაგეგმილ გაყალბების ფაქტებს, რომელსაც ხელისუფლება აპირებს ჯავახეთის რეგიონში. ", განაცხადა ბეჟაშვილმა, რომლის თქმითაც, „ძალა ერთობაშია"-ს წევრები მოითხოვენ აღნიშნულ ფაქტზე, გენერალური ინსპექციიდან და ცესკო-დან სასწრაფო რეაგირებას.