„კარგია, რომ როგორც საქართველოს პრემიერი, ასევე მსოფლიო ქვეყნების ლიდერები, მათ შორის ბრიტანეთის პრემიერ მინისტრი, ესტონეთის და უკრაინის პრეზიდენტები, ცალსახად საუბრობენ რუსეთზე, როგორც აგრესორზე და საფრთხეზე მსოფლიოს ბევრი ქვეყნისთვის“, განაცხადა უმრავლესობის დეპუტატმა ნინო გოგუაძემ საქართველოს პრემიერ მინისტრის გაეროში გამოსვლის შეფასებისას.

„საქართველოს პრემიერმა ჩვენს ქვეყანაში მიმდინარე პროცესები ერთ დიდ კონტექსტში დაანახა საერთაშორისო საზოგადოებას - ერთის მხრივ, საქართველო, რომელის ტერიტორიები ოკუპირებულია რუსეთის მიერ და რომელიც ყოველდღიურად განიცდის რუსეთის აგრესიის უმძიმეს შედეგებს, და მეორეს მხრივ, საქართველო, როგორც დემოკრატიული რეფორმების ქვეყანა, რომელსაც აქვს უნიკალური როლი და რეალური შესაძლებლობა იყოს მთავარი ფაქტორი რეგიონში უსაფრთხოების და სტაბილურობის განმტკიცებისთვის და ასევე, ეკონომიკური პროცესების განვითარებისთვის.

კარგია, რომ როგორც საქართველოს პრემიერი, ასევე მსოფლიო ქვეყნების ლიდერები, მათ შორის ბრიტანეთის პრემიერ მინისტრი, ესტონეთის და უკრაინის პრეზიდენტები, ცალსახად საუბრობენ რუსეთზე, როგორც აგრესორზე და საფრთხეზე მსოფლიოს ბევრი ქვეყნისთვის და აღიარებენ, რომ საერთაშორისო საზოგადოება და გაერო ვერ არის ეფექტური დროულად და ადეკვატურად უპასუხოს ამ საფრთხეებს. იმედი მაქვს, რომ მსოფლიო ლიდერების ეს განცხადებები კონკრეტულ მოქმედებებში გადაიზრდება და არსებული საერთაშორისო წესრიგის დამცველი და გარანტი ეს ორგანიზაცია უფრო ეფექტიანად გაუმკლავდება რუსეთის აგრესიას დამოუკიდებელი ქვეყნების მიმართ“, მიიჩნევს გოგუაძე.