„ომეგა ჯგუფის" საქმეზე დეპუტატ რომან კაკულიას განცხადებას საპარლამენტო უმრავლესობაში ეხმაურებიან.

როგორც გიორგი ვოლსკი ამბობს, კაკულიამ განცხადებისას ხაზი გაუსვა, რომ სიმართლე, რომელიც „ქართული ოცნების" მხარესაა, მალე დადგინდება.

„გაუსვა ხაზი იმაში, რომ დარწმუნებულია, რომ სიმართლე იქნება იმ მხარეს, რომელსაც ასე ინტენსიურად უტევენ, მაგრამ უტევენ ის ადამიანები, ის კომპანია, რომელიც ჩვენ გავათავისუფლეთ, რომლის ხელმძღვანელი მიწაზე ახოხიალა „ნაციონალურმა მოძრაობამ“, ჩვენ დავაწყებინეთ ახლიდან საერთოდ საქმიანობა და ბიზნესი, როგორც მას, ასევე უამრავ სხვას და ეს ორგანიზაცია დღეს უარს აცხადებს, ბიუჯეტში გადაიხადოს თანხა და უკვე შანტაჟზე გადავიდა იმ ჩანაწერებით, რომელიც აბსოლუტურად გაუგებარია, თუ რომელი კუთხიდან შეიძლება ეხებოდეს ხელისუფლებას გარდა იმისა, რომ გვარებს ახსენებს ვიღაც აბდაუბდას", განაცხადა გიორგი ვოლსკიმ ჟურნალისტებს.

რომან კაკულიამ „ქართული ოცნების“ შესაძლო დატოვების შესახებ განაცხადა და თქვა, რომ თუ „ომეგა ჯგუფის“ ჩანაწერების ნამდვილობა დადასტურდება, ის „არ ისურვებდა გუნდში დარჩენას“.