ქალაქ ონში სპორტული კომპლექსის აღდგენითი სამუშაოები მიმდინარეობს. როგორც GUARDIAN.GE-ს ონის მუნიციპალიტეტის მერიის სივრცითი მოწყობისა და ინფრასტრუქტურის სამსახურის უფროსმა, თეიმურაზ გრძელიშვილმა განუცხადა, სარეაბილიტაციო-სარეკონსტრუქციო სამუშაოები, რომელთა სახელშეკრულებო ღირებულება 740 000 ლარს შეადგენს, რეგიონში განსახორციელებელი პროექტების ფონდის დაფინანსებით ხორციელდება.

„სპორტული კომპლექსის რეაბილიტაცია - ეს არის ერთ-ერთი ძალიან მნიშვნელოვანი პროექტი, რომლის განხორციელებაც დაიწყო გასულ წელს. შენობა აშენებული იყო 80-იან წლებში, მაგრამ მოშლილი იყო სველი წერტილები, იატაკი და არ იყო ხელსაყრელი გარემო სპორტსმენებისთვის - დაზიანებული იყო მთლიანად შიდა ინფრასტრუქტურა.

მოხდა ამის რეაბილიტაცია და რეაბილიტაციის გარდა, მოხდა ასევე რეკონსტრუქცია - შეიცვალა შენობის სახურავი, მოხდა სახურავის ამაღლება და მანდ განთავსდა, დაახლოებით, 7 სასტუმრო ნომერი, რომელიც უზრუნველყოფს 25 სპორტსმენის მიღებას. მოწესრიგდა საშხაპეები, გავაკეთეთ სათადარიგო სპორტული ოთახი ტრენაჟორებისთვის. მთლიანად შეიცვალა იატაკი, კარ-ფანჯარა. 

ონის სპორტული კომპლექსი აერთიანებს საკალათბურთო და საფეხბურთო მოედანს, გასახდელებს, საშხაპეებს, ადმინისტრაციულ ოთახებს. სამუშაოები ფაქტობრივად შესრულებულია. ვფიქრობთ, რომ ექსპლოატაციაში წელს შევა კომპლექსი, მაგრამ სრულად დატვირთვა მოგვიანებით მოხდება. ეს იყო მხოლოდ რემონტი, საჭიროა ინვენტარიზაცია", უთხრა GUARDIAN.GE-ს თეიმურაზ გრძელიშვილმა.