პრემიერ-მინისტრ ირაკლი ღარიბაშვილის განცხადებით, ჩვენი ქვეყნის რეალობაში ბიძინა ივანიშვილის როლი ძალიან დიდია და ეს ბუნებრივიცაა, რადგან წლების განმავლობაში ვერც ერთმა ლიდერმა ვერ მოახერხა საზოგადოებისა და ოპოზიციური ძალების კონსოლიდაცია, რათა ქვეყნისთვის სააკაშვილის რეჟიმი მოეშორებინა, ბიძინა ივანიშვილმა კი ეს შეძლო.


მისი თქმით, ექსპრემიერმა მთელი ერისა და პოლიტიკური სპექტრის კონსოლიდაცია მოახდინა და უმტკივნეულოდ, ყოველგვარი გართულებების გარეშე, ნაციონალების ხელისუფლება არჩევნების გზით შეცვალა.


ამის შესახებ პრემიერმა გაზეთ „ასავალ-დასავალთან“ განაცხადა და აღნიშნა, რომ ივანიშვილთან მისი კომუნიკაცია უჩვეულო არ არის.


„მე, როგორც მოქმედ პრემიერ-მინისტრს, ყოფილ პრემიერ ბიძინა ივანიშვილთან კომუნიკაცია რომ მქონდეს ამაში უჩვეულო არაფერია. ყველა ცივილიზებულ სახელმწიფოში - ამერიკის შეერთებული შტატები იქნება თუ ევროპის წამყვანი ქვეყნები - მოქმედი პრემიერები და პრეზიდენტები, რჩევებსა და კონსულტაციებს ყოფილი პრეზიდენტებისგან და პრემიერებისგან იღებენ, მათთან ერთად ქვეყნისთვის საჭირბოროტო საკითხებზე მსჯელობენ და ეს აბსოლუტურად ჯანსაღი მოვლენაა“, - განაცხადა ირაკლი ღარიბაშვილმა.


მან ბიძინა ივანიშვილის ხელისუფლებაში დაბრუნებაზეც ისაუბრა და განაცხადა, რომ ის დაკავებული პოსტიდან არ უნდა წასულიყო.


მისი თქმით, თუ ივანიშვილი დაბრუნებას გადაწყვეტს, ამაში ხელს არაფერი შეუშლის და დაბრუნდება.


„თუ ბიძინა ივანიშვილს პოლიტიკაში დაბრუნების სურვილი გაუჩნდება და ამის აუცილებლობას დაინახავს, იგი ამას ყოველგვარი აჟიოტაჟისა და ხმაურის გარეშე გააკეთებს, ისე, რომ წინ ვერაფერი აღუდგება. თავის დროზე, როცა ივანიშვილი პოლიტიკიდან წავიდა, მე ვფიქრობდი რომ არ უნდა წასულიყო, მაგრამ მან სხვანაირად გადაწყვიტა. როგორც თავად განაცხადა, თუკი საჭიროებას დაინახავს, ის ქვეყნის ინტერესებიდან გამომდინარე დაბრუნების გადაწყვეტილებას აუცილებლად მიიღებს“, - განაცხადა ირაკლი ღარიბაშვილმა.