28 ოქტომბერს ივანიშვილი დაასრულებს სახელმწიფოს მართვას, განაცხადა საქართველოს ყოფილმა პრეზიდენტმა მიხეილ სააკაშვილმა „რუსთავი 2“-ის პირდაპირ ეთერში ვარშავიდან ჩართვისას.

ყოფილმა პრეზიდენტმა მისი და ივანიშვილის მმართველობის პერიოდები შეადარა და თქვა, რომ მის დროს საქართველოს ეკონომიკა მნიშვნელოვნად იზრდებოდა, ხოლო ივანიშვილის დროს სრული სტაგნაციაა.

მან ივანიშვილს „ძალიან პატარა კაცი“, „მელკი“, „ქონდრისკაცი“  უწოდა და აღნიშნა, რომ მან 3 მილიარდი ლარი იშოვა ბოლო წლებში საქართველოში, აქედან 350 მილიონი დოლარი ბიტკოინების მეშვეობით.

ყოფილმა პრეზიდენტმა განაცხადა, რომ ივანიშვილისაგან განსხვავებით მას არ გაუძარცვია ქვეყანა და მისი თქმით, ამის დამადასტურებელია ის, რომ მის ანგარიშებზე მხოლოდ რამდენიმე ათასი ევრო ირიცხება.

„ივანიშვილს 28 ოქტომბერს ორი არჩევანი აქვს - ან ის აღიარებს ხალხის არჩევანს და გადააბარებს პრეზიდენტის პოსტს გრიგოლ ვაშაძეს, ან ის გააყალბებს არჩევნებს, როგორც ეს შევარდნაძემ გააკეთა“, თქვა სააკაშვილმა და დასძინა, რომ ეს არის ბოლო არჩევნები, როცა ქართველ ხალხს ეძლევა შანსი ხელისუფლებას ჩამოაცილოს ივანიშვილის რეჟიმი და ვადამდელი საპარლამენტო არჩევნების გზით შეცვალოს აღმასრულებელი ხელისუფლებაც.

"თუ ივანიშვილს უნდა რევოლუციის მიღება, ის მიიღებს რევოლუციას", აღნიშნა სააკაშვილმა და დაამატა, რომ "შევარდნაძე იყო ბევრად მაგარი, ჯიბეში ჩაისვამდა ამათ, ყველას", თუმცა მასაც მოუწია წასვლა და მით უფრო მოუწევს ივანიშვილს.