საქართველოს რეგიონული განვითარებისა და ინფრასტრუქტურის მინისტრის, მაია ცქიტიშვილის განცხადებით, „ომეგა ჯგუფისა" და ტელეკომპანია „იბერიას" საქმეზე გავრცელებული აუდიოჩანაწერებით აპოკალიფსური სურათის დახატვა „ნაციონალური მოძრაობის" ხელწერაა.

მინისტრი ამბობს, რომ აუდიოჩანაწერები არის დამონტაჟებული და გაუგებარია მთავრობის კრიზისზე საუბარი, როდესაც კრიზისი რეალურად „ნაციონალურ მოძრაობას" აქვს.

„ინფორმაცია, რომელიც გავრცელდა არის ის, რომ ეს არის მონტაჟი - ერთი ჩანაწერიც კი არ არის, სხვადასხვა ჩანაწერის მონტაჟია. ადამიანები ლაპარაკობენ რაღაც ვერსიებზე და შესაბამისად, გაუგებარია პრობლემა ამ შემთხვევაში და კრიზისი ამ შემთხვევაში მთავრობის - ვისმენთ კომენტარებს სამთავრობო კრიზისებზე. კრიზისი მთავრობას კი არა, „ნაციონალურ მოძრაობას" აქვს - საარჩევნო პროცესშია და ვერც კანდიდატი ვერ კრეფს, როგორც ჩანს, საჭირო ხმებს და არის საჭირო ისევ იმ ხელწერით, ისევ იმ აპოკალიფსის განცდის შექმნა, რათა მოხდეს ამ საარჩევნო პროცესში ჩართულობა.

მეორე მხრივ, „ომეგას" აქვს, სამწუხაროდ, როგორც ჩანს, კრიზისი, რადგან ვერ ახერხებს უკვე მეთორმეტეჯერ გადავადებული დავალიანების გასტუმრებას და შესაბამისად, ეს არის სპექკალი გათამაშებული ამ სტრუქტურების მიერ", უთხრა ცქიტიშვილმა ჟურნალისტებს.

„ომეგა ჯგუფის" საქმესთან დაკავშირებით, ტელეკომპანია „რუსთავი 2" მორიგ აუდიჩანაწერს ასაჯაროვებს. სატელეფონო ჩანაწერში, სავარაუდოდ, „ქართული ოცნების" ერთ-ერთი დაფუძნებელი ლევან ყიფიანი და „ომეგა ჯგუფის“ წარმომადგენელი ნიკოლოზ ასანიძე საუბრობენ.

ჩანაწერში სპორტის ყოფილი მინისტრი ყოფილი პრემიერ მინისტრის, გიორგი კვირიკაშვილის გვარს ახსენებს და აღნიშნავს, კვირიკაშვილი „ომეგა ჯგუფის" საქმეზე ბიძინა ივანიშვილს შეხვდა.