„ნაციონალური მოძრაობის“ წევრმა და გაერთიანებული ოპოზიციის „ძალა ერთობაშია“-ს პრეზიდენტობის კანდიდატმა, გრიგოლ ვაშაძემ გადაცემა „არჩევანში“ განაცხადა, რომ „გუშინწინ გავიღვიძეთ და აღმოვაჩინეთ, რომ საქართველო არის მაფიოზური კლანის ხელში.

ვაშაძე საქართველოს პარლამენტის თავმჯდომარის განცხადებებს ეხმაურება, რომელმაც „ნაციონალური მოძრაობა“ ღალატში დაადანაშაულა. მისი თქმით, დღევანდელი ხელისუფლების გადაწყვეტილებაა, რომ სულ 9 წელზე ისაუბროს.

ქვეყანაში სისტემური დანაშაულებები ხდება. ვაშაძის თქმით, საგამოძიებო უწყებები „ომეგა ჯგუფის“ საქმეზე გავრცელებულ სკანდალურ ჩანაწერებში ფიგურანტი პირები უნდა გამოიკითხონ.

პრეზიდენტობის კანდიდატის თქმით, თუ ბიზნესმენი ზაზა ოქუაშვილი სახელმწიფოს გადასახადს არ უხდიდა, მაშინ კანონის შესაბამისად უნდა ემოქმედათ და არ უნდა დაებარებინათ „საქმის გასარჩევად“.

„ე.წ. „ქართული ოცნების“ ამ ე.წ. ხელისუფლების, რომელიც ამოხეთქილ საკანალიზაციო ლუქსს დაემსგავსა, ეს არის მაგათი არჩეული ის რომ მუდმივად ილაპარაკონ ყველამ ცხრა წელი, ექვსი წელი, ოთხი წელი, ორი წელი მაშინ როდესაც 150000 ბავშვი შიმშილობს, მილიონი ადამიანი სიღატაკეში ცხოვრობს და მაშინ როდესაც ჩვენ გუშინწინ გავიღვიძეთ და აღმოვაჩინეთ, რომ საქართველო არის მაფიოზური კლანის ხელში, რომელიც უკვე დამტკიცებული არის და რასაც თავისი ვერდიქტი გამოუტანა მთელმა თითქმის პოლიტიკურმა სპექტრმა, მინუს ერთი ცამეტმა არასამთავრობო ორგანიზაციამ და საქართველოს მოსახლეობის 99%-მა.

ყველა უნდა დაიკითხოს, ივანიშვილიდან დაწყებული და შემდეგ პროკურატურამ უნდა ჩაატაროს, რაც შეიძლება, სწრაფად გამოძიება და სასამართლოში ვიხილოთ ეს საქმე.

რაც მთავარია, ეუბნებიან, შენ თუ გინდა, პრობლემები დაამთავრო, ნუ გადააქცევ შენს ტელევიზიას რუსთავი2-ად, ჩაგვაბარე იბერია და ყველაფერი კარგად იქნებაო. ეს არის სამართლებრივი მხარე. ოქუაშვილი იხდიდა თუ არ იხდიდა გადასახადებს, ეს მისი და კანონის გასარკვევი არის და რა უფლებით იჯდა ივანიშვილი ამ საქმის გარჩევაზე, რომელიც პარტიის თავმჯდომარეც კი არ იყო მაშინ, მაინტერესებს უბრალოდ, „პახანია“? ან რა საქმე ჰქონდა იქ ე.წ. ბიზნესომბუდსმენ გახარიას“, განაცხადა გრიგოლ ვაშაძემ.