საქართველოს ყოფილი პრემიერ მინისტრისა და ყოფილი შინაგან საქმეთა მინისტრის, ივანე მერაბიშვილის ოჯახი უცხოელი ექიმების ჩამოყვანას გეგმავს. როგორც ცოტა ხნის წინ გამართულ ბრიფინგზე მერაბიშვილის ადვოკატმა, გიორგი ჩივიაშვილმა განაცხადა, ყოფილი ხელისუფლების ყოფილ მაღალჩინოსანს, რომელიც მსჯავრდებულია და რომლის ჯანმრთელობის მდგომარეობის შესახებ, ქართველმა ექიმებმა, დაგვინებული კვლევების გამო, დიაგნოზი ვერ დასვეს, იქნებ, უცხოელმა სპეციალისტებმა დაუსვან დიაგნოზი.

„გუშინ, კლინიკა „მედიქლაბში" შედგა კონსილიუმი, ექიმებმა მერაბიშვილის ჯანმრთელობასთან დაკავშირებით იმსჯელეს. კვლევები ჩატარდა. კონსილიუმი მივიდა ისევ იმ დასკვნამდე, რომ ეს არის ჰორნერის სინდრომი. მაგრამ თუ რამ გამოიწვია ეს სინდრომი, მათთვის გაუგებარია. ექიმებს შორის იყო აზრთა სხვადასხვაობა, ექიმების ნაწილი გამოთქვამდა, რომ აღნიშნული პრობლემა შეიძლება უფრო გართულდეს და მიმდინარე პროცესია ორგანიზმში, რაც შეიძლება შემდეგ მენინგიტის საშიშროება გახდეს დახურულ სივრცეში, აღნიშნულ მოსაზრებას ნაწილი ექიმებისა არ დაეთანხმა.

ასევე, იყო გამოთქმული მოსაზრება ექიმების მიერ, რომ თუკი, ეს კვლევები ჩაუტარდებოდა მერაბიშვილს დროულად, აბსოლუტურად სწორად იქნებოდა დიაგნოზირებული, რაც სამწუხაროდ, სასჯელაღსრულების მიერ ეს არ მოხდა. მას საწყის ეტაპზე მკურნალობდნენ რინიტსა და კონიუნქტივიტზე, რამაც მიგვიყვანა იმ შედეგამდე, რომ დღეს პრაქტიკულად შეუძლებელი გახდა დიაგნოზის დასმა, თუ რა სჭირს ივანე მერაბიშვილს.

დაგვიანებული კვლევა აღმოჩნდა ერთ-ერთი ძირითადი საფუძველი იმისა, რომ ჩვენ არ გვაქვს დღეს დიაგნოზი. დღეს მერაბიშვილი მკურნალობის კურსს არ გადის. ყოველივე ამის შემდეგ, მივედით იმ დასკვნამდე ოჯახთან ერთად ადვოკატები, რომ - ვინაიდან, ვერ ხერხდება დიაგნოზის დასმა - ჩვენ ვაგზავნით ყველა სამედიცინო კვლევას საზღვარგარეთ და ვაპირებთ უცხოელი ექიმების ჩამოყვანას. მოვითხოვთ მერაბიშვილის სამოქალაქო საავადმყოფოში მრავალპროფილურ კლინიკაში გაყვანას, რომ მოვახერხოთ და ვანახოთ უცხოელ სპეციალისტებს და იმედია, ისინი მაინც მოახერხებენ დიაგნოზის დასმას", განაცხადა ადვოკატმა, გიორგი ჩივიაშვილმა.