პრეზიდენტობის კანდიდატი შალვა ნათელაშვილი 1990-იან წლებში მისივე თანაპარტიელის, შევარდნაძის პრეზიდენტობისას თბილისის საკრებულოს თავმჯდომარის, ლადო კახაძის შესახებ ამბობს, რომ იგი 1998 წელს დილარ ხაბულიანის მეშვეობით უშიშროებამ ჩანერგა „ლეიბორისტულ პარტიაში“, როგორც ნაღდი ქალაქელი და ისე გახადა საკრებულოს თავმჯდომარე, „თავი სიზმარში ეგონა“, დღეს კი კახაძე „ბიძინას ჰამაკში ნებივრობს“.

არაკაცი ლადო კახაძე 1998 წელს ჩვენივე ფრაქციის წევრის დილარ ხაბულიანის მეშვეობით უშიშროებამ შემოგვიგდო როგორც ნაღდი ქალაქელი და სახელოვანი გინეკოლოგი. ერთი წვეთი ოფლი არ დაუღვრია, ერთი თეთრი არ გაუღია ისე შევათრიე თბილისის საკრებულოში ჩემი სისხლით, თავგანწირვით და ისე დავსვი საკრებულოს თავმჯდომარედ, თავი სიზმარში ეგონა. ვფიქრობდი ამ უანგარობას დააფასებდა და მე თუ არა ქალაქს მაინც უერთგულებდა. მეტი არაა ჩემი მტერი. ერთ წელში პირდაპირ შევარდნაძის სარეცელში ისკუპა თავისნაირ ძალადყარაჩოხელ სულაძე-ქავთარაძესთან ერთად და სანაცვლოდ იმდენი ფართები, მიწები დაითრია შარდენიდან ვაკემდე, მისი შთამომავლობა უდავოდ მშვიდად იქნება. ასეთები იგივენი არიან მარად და მარად. ამიტომ ნუ გაგიკვირდებათ, რომ ახლა ბიძინას ჰამაკში ნებივრობს“, წერს ნათელაშვილი „ფეისბუქზე“.

ლადო კახაძემ 2018 წლის 28 ოქტომბრის საპრეზიდენტო არჩევნებში მხარი დამოუკიდებელ და მმართველი პარტიის მიერ სრულად მხარდაჭერილ კანდიდატს, სალომე ზურაბიშვილს, პარასკევს, ოფიციალურად დაუჭირა.

თუ სალომე ზურაბიშვილი მოღალატეა, მეც მოღალატე ვარ მასთან ერთად, – განაცხადა ექიმმა ლადო კახაძემ რუსთაველის თეატრში, სალომე ზურაბიშვილის მხარდამჭერებთან შეხვედრისას.