საქართველოს პარლამენტის ყოფილმა თავმჯდომარემ, „დემოკრატიული მოძრაობის“ ლიდერმა, ნინო ბურჯანაძემ „პალიტრანიუსის“ გადაცემაში „7VS1“ განაცხადა, რომ  რუსეთის ჯარის საქართველოდან გაყვანა რომ  ზურაბიშვილის დამსახურებაა, ძალიან მამაცი ტყუილია. 

პარლამენტის ყოფილი თავმჯდომარე იხსენებს, რომ სალომე ზურაბიშვილი ამ პროცესს, როგორც საგარეო საქმეთა მინისტრი წამოეწია, თუმცა მისი უფლებამოსილებიდან გამომდინარე, ჯარის გადაადგილებაში მონაწილეობას ვერ მიიღებდა.

„ლავროვის დამსახურებაა ახლა, რუსეთის ჯარი ოსეთში და აფხაზეთში რომ დგას?! საგარეო საქმეთა მინისტრებს არც შემოჰყავთ ჯარები და არც გაჰყავთ! საგარეო საქმეთა მინისტრებს რაღაცას ავალებენ და ამას აკეთებს. ქალბატონ სალომეს რომ ეთქვა, რომ მე დიდი წვლილი შევიტანე რუსეთის ჯარების გაყვანაში, მას დავეთანხმებოდი, წვლილი შეიტანა, თუმცა არა დიდი, მაგრამ ის, რომ ზურაბიშვილის დამსახურებაა რუსეთის ჯარის საქართველოდან გაყვანა, რბილად რომ ვთქვა ძალიან მამაცი ტყუილია.

პირველი მოლაპარაკება შედგა 1994 წელს, სადაც ხელი მოაწერეს საქართველოსა და რუსეთის თავდაცვის მინისტრებმა. მეორე მოლაპარაკება შედგა 1995 წელს, შემდგომ 1999 წელს სტამბულში ეუთოს სამიტზე მოლაპარაკება შედგა, სადაც ხელი მოაწერა შევარდნაძემ, კლინტონმა, დემირელმა და 30 პრეზიდენტმა, რომ ეს ჯარები უნდა გასულიყო. მერე მიმდინარეობდა მოლაპარაკებები უკვე გრაფიკის დადგენაზე, რადგან რუსები ითხოვდნენ 2015-20 წლამდე ჯარების დატოვებას და ჩვენი პოზიცია იყო 2005-10-წლამდე დატოვება. ამ პროცესს წამოეწია ქალბატონი სალომე, რომელიც არც 1994 და არც 1999 წელს არამცთუ საქართველოში არ იყო, საერთოდ ევროპაში და რუსეთში არ იყო და მე მგონი ჩადში იყო მესამე მდივანი საელჩოში“, განაცხადა ნინო ბურჯანაძემ.