ონის მუნიციპალიტეტში ბარი-მრავალძლის დამაკავშირებელი გზის აღდგენითი სამუშაოები მიმდინარეობს.

როგორც GUARDIAN.GE-ს ონის მერიის სივრცითი მოწყობისა და ინფრასტრუქტურის სამსახურის უფროსმა, თეიმურაზ გრძელიშვილმა განუცხადა, პროექტი რამდენიმე ეტაპიანია და მასზე ჯამში, დაახლოებით, 4.5 მილიონი ლარი დაიხარჯება.

„ბარი-მრავალძლის გზა საკმაოდ დიდი პროექტია. პროექტზე მუშაობა 2016 წელს დავიწყეთ. გზა მოიცავს როგორც ონის, ისე ამბროლაურის მუნიციპალიტეტების ტერიტორიას. ამბროლაურის ტერიტორიაზე არის აღნიშნული გზის 2-კილომეტრიანი მონაკვეთი, რომელიც უკვე გააკეთა ამბროლაურმა. ჩვენი მუნიციპალიტეტის ტერიტორიაზე გასული წლების განმავლობაში ასფალტი დაიგო ასევე 2 კმ-ზე. წელს, მიმდინარეობს კიდევ 4-კილომეტრიანი მონაკვეთის აღდგენითი სამუშაოები და წელსვე დასრულდება. საერთო ჯამში, წელს სამუშაოების დასრულების შემდეგ, ონის მუნიციპალიტეტის ტერიტორიაზე 6-კილომეტრიანი მონაკვეთი თავისი სანიაღვრე არხებით იქნება აღდგენილი.

რჩება გასაკეთებელი კიდევ 6 კმ. აღნიშნული 6 კმ-დან ჩვენ მესამე ეტაპის სამუშაოების ფარგლებში, მომავალ წელს, 3 კმ-ს გავაკეთებთ და თუ კლიმატურმა პირობებმა ხელი შეგვიწყო, ვიმედოვნებთ, რომ მესამე ეტაპის სამუშაოები წელსვე დაიწყება. 2019 წლის ბოლომდე, ჩვენ ალბათ შევძლებთ, რომ მრავალძლის ტაძრამდე იყოს ასფალტირებული გზა.

ბარი-მრავალძლის გზის აღდგენას რეგიონული განვითარების ფონდი აფინანსებს. სრული პროექტის ღირებულება არის 4.5 მილიონი ლარი, აქედან შარშან დავხარჯეთ 1000 000 ლარი, წელს ვხარჯავთ 1 400 000-ს", უთხრა GUARDIAN.GE-ს თეიმურაზ გრძელიშვილმა.