საქართველოს საგარეო საქმეთა სამინინსტრო, საბერძნეთში საქართველოს მოქალაქეებისთვის შეღავათებს აწესებს.


სამინისტრომ გადაწყვეტილება მიიღო, რომ მიმდინარე წლის 1, 2 და 3 ივლისს საკონსულო მოსაკრებლის გადასახადისგან ყველა ის პირი გათავისუფლდეს, ვინც გადაუდებელი აუცილებლობიდან გამომდინარე საბერძნეთის რესპუბლიკაში საქართველოს საელჩოს და ქალაქ სალონიკში საქართველოს გენერალურ საკონსულოს მიმართავს.


საქართველოს მოქალაქეებს საშუალება ექნებათ უფასოდ შემდეგი სახის საკონსულო მომსახურებები მიიღონ: საქართველოში დასაბრუნებელი მოწმობის აღება; სანოტარო აქტი - მინდობილობის დამოწმება (საგანმანათლებლო დაწესებულებებში საქმის წარმოების შესახებ); სანოტარო აქტი - ხელმოწერის დამოწმება (თანხმობა არასრულწლოვანი პირების მგზავრობის შესახებ, სახელის დარქმევის შესახებ); სხვადასხვა სახის ცნობები (ე.წ. ოჯახური შემადგენლობის შესახებ, იდენტურობის შესახებ); საკონსულო ლეგალიზაცია - დაბადების მოწმობისა და ავტოსატრანსპორტო საშუალებების შესახებ.


საგარეო საქმეთა სამინისტროს ეს გადაწყვეტილება, საბერძნეთში ბანკების მუშაობის შეჩერებას უკავშირდება.


საბერძნეთში საქართველოს ელჩის იოსებ ნანობაშვილის განცხადებით, ეს შეღავათები მას შემდეგ მოიხსნება, რაც ბანკები მუშაობის ჩვეულ რეჟმში გაგრძელებას შეძლებენ.


„პირველ ეტაპზე იმ მომსახურების მიღებაზე, რომლებსაც ნაღდი ანგარიშსწორება სჭირდება, საქართველოს მოქალაქეებს პრობლემა შეექმნათ, ამიტომ მივიღეთ გადაწყვეტილება, რომ დღეს დილიდან გარკვეული სახის მომსახურებას ისინი უფასოდ მიიღებენ. ეს ღონისძიება საბერძნეთის კრიზისის განმავლობაში იმოქმედებს და მაშინ მოიხსნება, როცა პრობლემები აღარ იქნება და ბანკები მუშაობას გააგრძელებენ“, - განაცხადა ნანობაშვილმა.


საბერძნეთი საერთაშორისო სავალუტო ფონდს ვალს არ გადაუხდის, - ამის შესახებ საბერძნეთის ფინანსთა მინისტრმა, იანის ვარუფაკისმა გუშინ განაცხადა. ინფორმაციას ამის შესახებ Reuters -ი ავრცელებს. ათენს გუშინ ბოლო დღე ჰქონდა 1,6 მილიარდი ევროს ოდენობის ვალის სავალუტო ფონდისთვის გადასახდელად.


ევროკომისიამ ბერძნულ მხარეს ახალი წინადადება შესთავაზა, კერძოდ, თუ ათენი დათანხმდება საერთაშორისო კრედიტორების წინადადებას რეფორმების გატარების შესახებ, მაშინ იგი 1,6 მილიარდი ევროს გადახდისგან თავისუფლდება.


ევროზონის ლიდერების წინადადების შესახებ საბერძნეთში 5 ივლისს რეფერენდუმი ჩატარდება. რეფერენდუმზე მოსახლეობამ უნდა გადაწყვიტოს, უჭერენ თუ არა ისინი მხარს ქვეყანაში მკაცრი ეკონომიკური რეფორმების გატარებას, რასაც საერთაშორისო კრედიტორები ფინანსური დახმარების ნაცვლად ითხოვენ. იმ შემთხვევაში თუ ამომრჩეველი ევროზონის წინადადებას დათანხმდება, პრემიერ-მინისტრი, ალექსის ციპრასი თანამდებობის დატოვებით იმუქრება. თავის მხრივ ევროპელი ლიდერები აცხადებენ, რომ თუ 5 ივლისის რეფერენდუმზე ბერძენი ამომრჩეველი საერთაშორისო კრედიტორების წინადადებას მხარს არ დაუჭერს, მაშინ საბერძნეთს ევროზონის დატოვება მოუწევს.