საქართველოს პრეზიდენტმა გიორგი მარგველაშვილმა შეერთებულ შტატებში სამუშაო ვიზიტისას „ამერიკის ხმისთვის“ მიცემულ ინტერვიუში განაცხადა, რომ მისთვის პრეზიდენტობის პერიოდში ყველაზე მთავარი საკითხები, რაზეც ის 5-წლიანი მმართველობისას ყველაზე მეტ ყურადღებას ამახვილებდა, პიროვნული თავისუფლების დაცვის უზრუნველყოფა და ქვეყნის სახელმწიფოებრიობის, მისი სუვერენიტეტის განმტკიცება იყო.

„საქართველო არის ოკუპირებული რუსეთის მიერ; რომ ეს არის ისტორიული უსამართლობა და რაც მთავარია, რომ აბსოლუტური რწმენა, რომ ჩვენ ამას აუცილებლად დავამარცხებთ, რომ რუსები არ შეირჩენენ და ჩვენც არ შევარჩენთ ამ ისტორიულ უსამართლობას. ისევე როგორც დაგვინგრევია ბევრი ჩვენზე ძლიერი იმპერიის, ასე ვთქვათ, მტკიცე ბურჯები საქართველოში და ეს გაგვინადგურებია და აღგვიდგენია ჩვენი მთლიაობა, ასევე რუსებს ჩვენ გავუშვებთ საქართველოდან... საქართველოს მიწა-წყალზე არასოდეს უნდა იყოს ოკუპანტი და სანამ იქნება, არც ერთი ქართველი ამას არ უნდა შეეგუოს“, თქვა პრეზიდენტმა და დაამატა:

„სანამ არ დამთავრდება ოკუპაცია, ეს არის მუდმივი მტკიცება, რომ ჩვენი ქვეყნის ოკუპანტი, რუსეთის ფედერაცია დღესაც, 100 წლის წინათაც, მანამდეც, ახორციელებდა აგრესიულ პოლიტიკას რეგიონში, რომ ამას ჩვენ არასდროს არ შევეჩვევით და არავის არ ეგონოს, მათ შორის სხვა მესამე ქვეყნებს, რომ როდესმე ჩვენ მშვიდად მივიღებთ ამას და როდესმე რაღაცნაირად დავივიწყებთ იმას, რომ ჩვენი მიწა-წყალი მიტაცებულია და რომ ამ პროცესში არ იქნება, ასე ვთქვათ, მიჩვევა და შეჩვევა ამის და რომ მათ ინტერსებშიც არის, რომ ჩვენ გვერდით იდგნენ და ერთად აღვადგინოთ საქართველოს ტერიტორიული მთლიანობა“.

გიორგი მარგველაშვილმა „ამერიკის ხმისთვის“ მიცემულ ინტერვიუში ისიც განმარტა, თუ რატომ თქვა უარი საპრეზიდენტო არჩევნებში მეორე ვადით კენჭისყრაზე.