„ლეიბორისტული პარტიის“ ლიდერმა და პრეზიდენტობის კანდიდატმა შალვა ნათელაშვილმა ეთნიკური უმცირესობების წარმომადგენლებთან შეხვედრაზე განაცხადა, რომ ყველას გვექნება თანაბარი აწმყო და ბედნიერი მომავალი, თუ ჩვენს ძალებს გავაერთიანებთ.

სასტუმრო „მუზეუმში“ შეკრებილი არასამთავრობო ორგანიზაციებისა და მედიასაშუალებების წარმომადგნელებს, რომლებიც ძირითადად სამცხე-ჯავახეთსა და ქვემო ქართლში, ეთნიკური უმცირესობებით მჭიდროდ დასახლებულ რაიონებში მუშაობენ, შალვა ნათელაშვილმა პროგრამული პრიორიტეტები გააცნო.

ნათელაშვილმა აღნიშნა, რომ მისი გაპრეზიდენტების შემთხვევაში, შეიქმნება ეროვნებათა საბჭო, რომელიც ეთნიკური უმცირესობების პრობლემებზე ორიენტირებული გაერთიანება იქნება.

„საბჭო გარკვეული პერიოდულობით განიხილავს ყველა იმ აქტუალურ, მომწიფებულ პრობლემას, რაც ამ მიმართულებებს უკავშირდება, მაგრამ ჩვენ უნდა ამოვიდეთ მთავარი აქცენტებიდან. ქართველს, აზერბაიჯანელს, სომეხს, ებრაელს, რუსს ებრაელს, აფხაზს, ოსს, უკრაინელს, პირველ რიგში, სჭირდებათ ადამიანური პირობები ცხოვრების, არსებობის, მუშაობის, განვითარების, შვილების გაზრდისთვის, რაც ამ ხელისუფლებამ წაგვართვა. ეს ყველამ ერთად უნდა დავიბრუნოთ“, აღნიშნა შალვა ნათელაშვილმა.