ყველაფერს აკეთებენ იმისათვის, რომ დავტოვო საქართველო, გავიქცე, მაგრამ ისინი ამას ვერ მოესწრებიან, განაცხადა პაატა ბურჭულაძემ მცხეთაში, გრიგოლ ვაშაძის მხარდამჭერების წინაშე სიტყვით გამოსვლისას.

„დღეს მე მაწუხებს ის, რაც თქვნ გაწუხებთ. მაწუხებს ის, რომ ეს მავნებელი მთავრობა, სხვა სიტყვა ამათზე არ შეიძლება ითქვას, ესენი არიან მავნებელები, რატომ იცით? ვერაფერი კარგი ვერ გააკეთეს 6 წლის განმავლობაში და ცდილობენ ყველაფერი დაარბიონ, რაც იყო გაკეთებული. ერთი წელია უკვე, ფონდი „იავნანა“, რომელსაც მე წარმოვადგენ, რომელიც ვართ სუყველანი ჩვენ. 14 წლის განმავლობაში რას ვაკეთებდით?! ერთმანეთს ვეხმარებოდით, რამდენი ოჯახი დავაბინავეთ, რამდენ ბავშვს გავუწოდეთ ხელი. ათასამდე ბავშვი თავის მშობლებს დავუბრუნეთ და ეს მავნებელი მთავრობა, უკვე 1 წელია, გვებრძვის ჩვენ სუყველას, მებრძვის მე და ყველაფერს აკეთებენ იმისათვის, რომ მე დავტოვო საქართველო და გავიქცე და შეიქმნას ისეთი რამ, რომ ვითომ რაღაც საშინელება ხდება. ხალხო, მე არ დავტოვებ საქართველოს, გაიგონ მაგენმა, მე აქ ვიქნები თქვენთან ერთად. ფონდში უკვე ხუმრობენ, მწარედ ხუმრობენ, ნეტა დავეჭირეთ სუყველა, ამდენი ხანი ამინისტია მაინც შეგვეხებოდაო და დამთავრდებოდა ყველაფერი. ამ სიკეთეს მაგენი ვერ მოსპობენ, ეს მავნებლები“, განაცხადა პაატა ბურჭულაძემ. 

სახელოვანმა საოპერო მომღერალმა თქვა, რომ სალომე ზურაბიშვილის პრეზიდენტად არჩევა დაუშვებელია, რადგან ის არც ქართველია და არც პატრიოტი.

„რამდენი ადამიანი დაგვასვა უკვე ბიძინა ივანიშვილმა თავზე, რომელმაც არ ივარგა, და მე მგონი ამას ბოლო უნდა მოეღოს“, აღნიშნა პაატა ბურჭულაძემ.