საპარლამენტო უმრავლესობის ლიდერი არჩილ თალაკვაძე „რუსთავი 2"-ის გენერალური დირექტორის, ნიკა გვარამიას განცხადებას ეხმაურება და ამბობს, რომ „წარმოუდგენელია და შეუთავსებელია თავისუფლებასთან, დემოკრატიასთან, როცა ტელევიზიის დირექტორი საზოგადოებას ადამიანის შევიწროებისკენ, დევნისკენ მოუწოდებს".

„არჩევნების იდეასთან წინააღმდეგობაში მოდის, როცა ტელევიზია საარჩევნო სუბიექტს ღიად ემუქრება. ამაზე სამოქალაქო საზოგადოების რეაქცია აუცილებელი იყო. სხვა მაგალითებიც დაგროვდა ბოლო პერიოდში, რაზეც რეაქცია არ არის, ან მიკერძოებულია და ეს ძალიან შემაშფოთებელია. შერჩევითი მიდგომა აზიანებს სამოქალაქო საზოგადოების იდეას.

როდესაც „ნაციონალური მოძრაობა" და მიხეილ სააკაშვილი გაქებთ არასამთავრობო ორგანიზაციებს, ესე იგი რაღაცას სწორად არ აკეთებთ, მეგობრებო", აცხადებს თალაკვაძემ.

გვარამიას განცხადებაზე ისაუბრა დღეს გამართულ საგანგებო ბრიფინგზე პარლამენტის თავმჯდომარემ, ირაკლი კობახიძემაც, რომელმაც „რუსთავი 2"-ის გენერალურ დირექტორსა და მის მხარდამჭერ არასამთავრობო ორგანიზაციებს ფაშისტები უწოდა.

ნიკა გვარამიას თქმით, „ყველა, ვინც სალომე ზურაბიშვილს ან აფინანსებს ან კამპანიაში სხვაგვარად ეხმარება, უკიდურესად უნდა შევავიწროვოთ.

„ყველა ეს ადამიანი უნდა დავიმახსოვროთ და გავაძევოთ საზოგადოებრივი ცხოვრების ყველა სფეროდან, იქნება ეს ბიზნესი, კულტურა თუ პოლიტიკა. ქვეყნის მოღალატე და მისი მოკავშირეები საჩვენებლად უნდა დაისაჯონ”, დაწერა გვარამიამ რამდენიმე დღის წინ „ფეისბუქის" საკუთარ გვერდზე.