„ევროპული საქართველოს" ერთ-ერთი ლიდერი გიგი უგულავა საქართველოს პარლამენტის თავმჯდომარის, ირაკლი კობახიძის დღევანდელ განცხადებას ეხმაურება და ამბობს, რომ იმ ფრაზების გამო, რასაც კობახიძე პოლიტიკური ოპონენტების მისამართით იყენებს, მოუწევს „პასუხის გაცემა".

„ის უპრაგონოდ ისვრის სიტყვებს - ჰოლოკოსტი, ფაშიზმი. აქამდე კიდევ ოდნავ მაინც განათლებული ადამიანის შთაბეჭდილებას ტოვებდა ეს კაცი და უნდა იცოდეს, რომ ამ ტერმინების ხმარება მასვე ცუდად დაუბრუნდება იმიტომ, რომ საერთაშორისო ასპარეზზე, ის არ არის ჩვეულებრივი დეპუტატი, ის არის პარლამენტის თავმჯდომარე და როდესაც ასეთ ფრაზებს ხმარობს ოპონენეტების მიმართ, მას მოუწევს ამ ფრაზებზე პასუხის გაცემა. ამ ფრაზებს აქვს კონკრეტული საერთაშორისო მნიშვნელობა და საერთაშორისო ტკივილი, რაც როგორც ჩანს, კობახიძეს საერთოდ არ ესმის", უთხრა „რუსთავი 2"-ს გიგი უგულავამ.

ირაკლი კობახიძემ ნიკა გვარამიას, მისი „ფეისბუქის" პირად გვერდზე სალომე ზურაბიშვილთან დაკავშირებით გაკეთებული განცხადების გამო და შემდეგ არასამათავრობო სექტორს ამ განცხადების არდაგმობის გამო, ფაშისტები უწოდა.