„მაპატიეთ და ამ სიბინძურემ, რამაც ამოხეთქა „ქართული ოცნებიდან“, განსაკუთრებით ბოლო წელიწადნახევარი, ამ ქურდულმა გარჩევებმა, რომელიც ფირზე ვნახეთ, „იბერიის“ საქმის გარშემო, ეთერში, ყველა მშობელს ასეთი შეკითხვა გაუჩინა: გინდა რომ აქ შენი შვილი გაიზარდოს? ახლა ამას ზემოდან ვადაგასულ ფრანგულს სუნამოს ასხამენ, გეგონება ეს უშველის. არაფერი აღარ უშველის ამას უკვე“, - განაცხადა „ძალა ერთობაშია“-ს საპრეზიდენტო კანდიდატმა, გრიგოლ ვაშაძემ „ფეისბუქის“ გადაცემა „სთორიში“ სტუმრობისას.

წამყვანის შეკითხვას - რამდენად შეძლებთ ააგოთ ურთიერთობა „ქართულ ოცნებასთან? – გრიგოლ ვაშაძემ უპასუხა, რომ „ქართულ ოცნებაშიც“ არიან პატრიოტი ადამიანები, რომლებთანაც ურთიერთობა გააჩნია და პარტიული კუთვნილების გამო „არავის დაკარგვას“ არ აპირებს.

„იცით, რა? სახელებს და გვარებს არ გეტყვით ეხლა, მაგრამ ხალხთან ურთიერთობებს ვაგრძლებ. „ქართული ოცნების“ უამრავი წევრი, მათ შორის ისინიც, ვინც სახეებად ითვლებიან, ისევე არიან მოტყუებულები, როგორც რიგითი წევრები. მე ხომ არაფერს არ ვიგონებ არა? მე რომ ვასახელებ ციფრს გამოვიდეს ვიღაცა და მითხრას, შიმშილზე, სიღატაკეზე, ემიგრაციაზე, ლარის... ვიღაცა გამოვიდეს და მითხრას, რომ ბატონო გრიგოლ, ან თავხედო ვაშაძე, მითხრას, შენ მიერ მოყვანილი იუნისეფის, გაერთიანებული ერების ორგანიზაციის და მსოფლიო ბანკის ციფრები არის მტკნარი სიცრუე. არავინ არ იძახის ამას. არავინ არ დავობს. გავიდა 6 წელიწადი, 6 წელიწადი გაჩერებულია ყველა პროექტი. არის სახელმწიფო ბიუჯეტის ხერხვა ბიძაშვილების და მამიდაშვილების მიერ და ქურდული გარჩევები, სიგარეტის ბაზარი და თავისუფალი მედია როგორ უნდა გაიყონ. თქვენ ეხლა გჯერათ, რომ „ქართულ ოცნებაში“ პატრიოტები არ არიან? მე ვიცნობ ამ ხალხს. 2013 წლის შემდეგ უამრავი ადამიანი მოდიოდა ჩემთან, ნუ ახლა ბოლო დროს არ მოდის გასაგები მიზეზების გამო, მაგრამ სანამ რიგითი მოქალაქე ვიყავი 2012 წლის 26 ოქტომბრიდან 2016 წლამდე, უამრავი ადამიანი მოდიოდა ჩემთან. ზოგს რჩევა სჭირდებოდა, ზოგს უბრალოდ ძველი დროის გახსენება და ა.შ. საქართველოში ყველა ან კლასელი ვართ, ან მეგობარი ვართ, ან ნათესავი ვართ ან ნათელ-მირონი ვართ. პარტიული კუთვნილების გამო არავის დაკარგვას არ ვაპირებ. არიან ხიდან ჩამოცვენილი ლეღვები „ქართულ ოცნებაში“, რომელთაც არაფერი არ უშველით, არაფერი, იმიტომ რომ ამისთანა ერთუჯრედიანობა და გაუნათლებლობა წარმოუდგენელია“, აღნიშნა ვაშაძემ.

შეკითხვაზე - მმართველობის კუთხით „ქართული ოცნების“ ყველაზე დიდ წარმატებად რას აღიქვამთ? - ვაშაძე პასუხობს:

„ყველაზე დიდ წარმატებად „ქართული ოცნების“ მე აღვიქვამ მაშინ, როდესაც წავლენ ხელისუფლებიდან ისე, რომ მათი ფეხებით გამოთრევა არ დასჭირდეს ხალხს“.