ლონდონის უმაღლესი სასამართლო ქონების წარმომავლობის დასაბუთებას ითხოვს აზერბაიჯანელი ქალბატონის, ზამირა ჰაჯიევასაგან, რომლის სახელი და გვარიც სასამართლოს მიერ ოთხშაბათამდე არ მჟღავნდებოდა და რომელმაც უნდა დაასაბუთოს, თუ როგორ შეძლო მან დიდ ბრიტანეთში ორი ძვირადღირებული უძრავი ქონების ყიდვა - ჯამური ღირებულებით 22 მილიონი გირვანქა სტერლინგი (29 მილიონი აშშ დოლარი), იტყობინება ბრიტანეთის „პრესის ასოციაცია“.

„პრესის ასოციაციის“ ცნობით, ჰაჯიევამ ასევე 16 მილიონ გირვანქა სტერლინგზე მეტი დახარჯა ათი წლის განმავლობაში მდიდრულ მაღაზია „ჰაროდსში“, განაცხადა უმაღლესი სასამართლოს მოსამართლემ.

თუ სამი შვილის დედა, 55 წლის ჰაჯიევა, რომლის მეუღლეც აზერბაიჯანელი ბანკირია, ვერ ახსნის როგორ შეძლოა ამხელა ოდენობის თანხების, ათეულობით მილიონი გირვანქა სტერლინგის, გამომუშავება, შესაძლოა მან თავისი ქონებები დაკარგოს. ერთ-ერთი საცხოვრებელი სახლი (დაბლა ფოტოზე), რომლის ღირებულებაც 11.5 მილიონი ფუნტი სტერლინგია, ლონდონის მდიდრულ უბანში, ნაითსბრიჯზე მდებარეობს, მაღაზია „ჰაროდსის“ სიახლოვეს.

ჰაჯიევას მეუღლე, ჯაჰანგირ ჰაჯიევი აზერბაიჯანში სახელმწიფოს მიერ კონტროლირებული „აზერბაიჯანის საერთაშორისო ბანკის“ ხელმძღვანელი იყო 2001 წლიდან 2015 წლამდე, ვიდრე ის გადადგებოდა. მოგვიანებით მას თაღლითობისა და თანხების მითვისება-გაფლანგვის ბრალდება წარედგინა და 15 წლით პატიმრობა მიესაჯა.

დიდ ბრიტანეთში დაუსაბუთებელი ქონების შესახებ გამოძიების წარმართვის საშუალება სამართალდამცველებს მიმდინარე წელს მიეცათ, რაც კორუფციასთან ბრძოლის უფრო ეფექტურად წარმოების საშუალებას იძლევა. მთავრობის თანახმად, ეს საჭიროებს „პირისაგან, რომლის მიმართაც გონივრული ეჭვი გაჩნდება“, იმის ახსნას, როგორ იქნა ქონება შეძენილი, თუკი მისი კანონიერი შემოსავლები ჩანს, რომ არასაკმარისია მის შესაძენად.