სამაუწყებლო კომპანია „რუსთავი 2“-ის ეთერში კვირას გასულ ფარულ აუდიო ჩანაწერებს, რომელიც სასჯელაღსრულების დაწესებულებაშია გაკეთებული და რომელშიც პროკურატურის ყოფილი მაღალჩინოსანი, მირზა სუბელიანი საუბრობს, საქართველოს ყოფილი პრეზიდენტი მიხეილ სააკაშვილი „ფეისბუქზე“ ეხმაურება და აცხადებს, რომ გუშინდელმა ჩანაწერმა დაადასტურა, რომ გენერალ გოგი თათუხაშვილის შვილი დაკითხვისას წამებით მოკლეს.

„გოგი თათუხაშვილი არის ძალიან ღირსეული საქართველოს გენერალი,რომელსაც ვილა არ აუშენებია და არც ფული მოუპარავს. სტასბურგში რომ წავიდა, პირველი რამდენიმე თვე უსახლკაროდ იყო და ხშირად ხიდის ქვეშ ათევდა ღამეს. მან სამშობლოს გაუზარდა ორი მეომარი, მათთან ერთად იბრძოდა ომში. მთელი ეს დრო, ის ამბობდა, რომ მისი შვილი შალვა დაკითხვისას წამებით მოკლეს და ამ ფაქტს პროკურატურა უარყოფდა. გუშინდელი ჩანაწერით, ეს დადასტურდა“, აცხადებს სააკაშვილი.