ქალაქ გარდაბანში, 21 ოქტომბერს, ყოველწლიური სახალხო დღესასწაული „გარდაბნობა 2018’’ გაიმართება.

„სახალხო დღესასწაულის ფარგლებში გარდაბანში კერძოდ, თბილსრესის მოედნისა და 9 აპრილის სკვერის მიმდებარე ტერიტორიაზე გაიმართება სხვადასხვა კულტურული და სპორტული ღონისძიება.

სპეციალურად დამონტაჟებულ 2 სცენაზე, მაყურებლის წინაშე საკონცერტო ნომრებით წარსდგებიან ქართული ესტრადის ახალგაზრდა შემსრულებლები. ღონისძიებაში ასევე მონაწილეობას მიიღებენ ადგილობრივი ფოლკლორულ-ქორეოგრაფიული ანსამბლები.

მოეწყობა საგამოფენო სივრცეები, სადაც ადგილობრივი მხატვრებისა და ხალხური რეწვის ოსტატების ნამუშევრები გამოიფინება.

მოეწყობა აგრო-პავილიონები, სადაც ნებისმიერ მსურველს შეეძლება, ადგილობრივი ბიოპროდუქტების დაგემოვნება და შეძენა.

ამავე დღეს, დაჯილდოვდებიან მუნიციპალიტეტში მცხოვრები წარჩინებული მოსწავლეები და გამოვლინდებიან საპატიო მოქალაქეები, რომელთაც სპეციალურად დაწესებული ჯილდო გადაეცემათ.

ღონისძიების ფარგლებში, პატარებისთვის უფასო იქნება სახეზე მოხატვა.

ღონისძიებას დაასრულებს რეგის, პოპ და ფოლკ-როკის ჟანრის მუსიკის შემსრულებელი ცნობილი ჯგუფი „33ა", რომელიც მაყურებლის წინაშე საათნახევრიანი სპეციალური პროგრამით წარსდგება.

„გარდაბნობა 2018" გრანდიოზული, საზეიმო ფოიერვერკით დასრულდება", ნათქვამია გარდაბნის მერიის პრესსამსახურის მიერ გავრცელებულ ინფორმაციაში.