მთავარი პროკურატურის მიერ გაკეთებულ განცხადებას ბადრი პატარკაციშვილის მკვლელობის მომზადების საქმის გახსნასთან დაკავშირებით, „ერთიანი ნაციონალური მოძრაობის“ წევრი, დეპუტატ სალომე სამადაშვილი „ძალიან უნიჭოდ დადგმულ პიარსვლას“ უწოდებს და ჟურნალისტებთან თემის კომენტირებისას ამბობს, რომ ხელისუფლება, მმართველობიდან 6 წლის თავზე „ქართველი ხალხის მოტყუებას უსინდისოდ ცდილობს, რადგან ქართველი ხალხისთვის სხვა შეთავაზება არ აქვს“.

„დღეს, 2018 წლის 17 ოქტომბერია. „ქართული ოცნება“ ქვეყანას ექვსი წელია მართავს, ლარის კურსი 2,68 ნიშნულზეა და ხელისუფლებას ისეთი საპრეზიდენტო კანდიდატი ჰყავს, რომელსაც მხარს არავინ არ უჭერს და მმართველი გუნდი არჩევნებს აგებს. ამ რეალობის ფონზე მთავარი პროკურატურის განცხადება ძალიან უნიჭოდ დადგმული პიარსვლაა, რომლითაც „ქართულმა ოცნებამ“ ქართველი ხალხის მოტყუება 2012 წელს შეძლო. დღეს „ქართული ოცნება“ იგივე მეთოდებით მუშაობს და არ გამიკვირდება, ხვალ შეიძლება მოვისმინო, რომ ილია ჭავჭავაძის მკვლელობა ვიღაცა სხვისი ბრალია, ან სხვა რაიმე აბსურდული განცხადება, მაგრამ ეს ყველაფერი არის უნიჭო, აბსურდული, ფუჭი მცდელობა და ქართველი ხალხი „ქართულ ოცნებას“ პასუხს 28 ოქტომბერს გასცემს. ხელისუფლება ქართველი ხალხის მოტყუებას უსინდისოდ ცდილობს, რადგან ქართველი ხალხისთვის სხვა შეთავაზება არ აქვს“, განაცხადა სალომე სამადაშვილმა.