„ძალა ერთობაშია“-ს საპრეზიდენტო კანდიდატი გრიგოლ ვაშაძე პრეზიდენტ მარგველაშვილის მიერ პრემიერ მინისტრისთვის მთავრობის საგანგებო სხდომის მოწვევის თაობაზე მიმართვას აფასებს და აცხადებს, რომ ხელისუფლება ცდილობს სახელმწიფოს ყველა ინსტიტუტის, მათ შორის პრეზიდენტის ოფისის დაკნინებას და „ლოგიკური საფუძველი არსებობს იმისა, რომ ეს მთავრობა გადადგეს თავის პრემიერმინისტრიანად“.

„როდესაც სახელმწიფოს არაფორმალური, არაკანონიერი, კრიმინალური, შეიარაღებული ბანდები მართავენ, რა გასაკვირია, რომ ისინი ცდილობენ სახელმწიფოს ყველა ინსტიტუციის დაკნინებას, მათ შორის პრეზიდენტის ოფისის დაკნინებას, რომელსაც უმაღლესი სამართლებრივი ლეგიტიმაცია აქვს ქართველი ხალხისგან. კონსტიტუცია არის პირდაპირ დარღვეული. ლოგიკური საფუძველი არსებობს იმისა, რომ ეს მთავრობა გადადგეს თავის პრემიერმინისტრიანად... ჩვენ რომ ნორმალური პარლამენტი გვქონდეს, სადაც თითებზე ჩამოსთვლელი ოპოზიციონერების გარდა კიდევ იქნებოდა მტკიცედ ოპოზიციური ძალები, ამ საკითხზე გამოძიება იქნებოდა პარლამენტში დაწყებული და უკვე მოითხოვნდენ მთავრობის გადაყენებას“, განაცხადა გრიგოლ ვაშაძემ „რუსთავი 2“-თან საუბრისას.