საქართველოს ყოფილი პრეზიდენტი მიხეილ სააკაშვილი ბადრი პატარკაციშვილის მკვლელობის საქმის გახსნაზე მთავარი პროკურატურის მიერ გავრცელებულ განცხადებას „ფეისბუქზე“ ვიდეოთი ეხმაურება და ამბობს, რომ ბიძინა ივანიშვილი ცდილობს დაავიწყოს ხალხს აღმშენებლობის ის წლები, რომელსაც თავად ედგა სათავეში.

სააკაშვილი აცხადებს, რომ ივანიშვილის „აღსასრული ახლოვდება“, რადგან საპრეზიდენტო არჩევნებში მისი კანდიდატი „კატასტროფულად აგებს“.

„მინდა ვუთხრა ყველას, რომ ჭორვილელი აფერისტი ივანიშვილი, რომელმაც მოატყუა, გაძარცვა და გააუბედურა ქართველი ხალხი, ცდილობს დაავიწყოს ხალხს აღმშენებლობის ის წლები, რომელსაც მე ვხელმძღვანელობდი, გადაფაროს ამ სისულელეებით და ასევე დაავიწყოს, თუ რამდენი მოატყუა, რამდენი გადააგდო, რამდენ ადამიანს დაუნგრია ცხოვრება. მაგრამ მისი აღსასრული ახლოვდება. 28-ში არის საპრეზიდენტო არჩევნები, რომელსაც იგი აგებს კატასტროფულად და ახლა ივანიშვილი იმყოფება უბრალოდ ჩოქმბჯენში და ეს კაცი არის ნამდვილი ავადმყოფი და ავადმყოფი, რომელიც არის ჩოქმბჯენში, ქართველმა ხალხმა რა უნდა ქნას? მე მგონი ყველამ ყველაფერი ვიცით. ჩვენი გამარჯვება ძალიან ახლოსაა“, აცხადებს სააკაშვილი.