„ევროპული საქართველოს" გენერალური მდივნის, გიგი უგულავას განცხადებას, რომლის მიხედვითაც, „ქართული ოცნების" რამდენიმე წევრი „ევროპულ საქართველოს" შეუერთდა, პარლამენტის ფრაქცია „ქართული ოცნების“ თავმჯდომარე მამუკა მდინარაძე ეხმაურება.

გიგი უგულავამ დღეს გამართულ საგანგებო ბრიფინგზე განაცხადა, რომ მმართველი პარტიის რიგებიდან მათ რიგებში 8 ადამიანი გადავიდა, მათ შორის, წყალტუბოს საკრებულოს მაჟორიტარი დეპუტატი კონსტანტინე შვანგირაძე. მამუკა მდინარაძე ამბობს, რომ არ იცის, ვინ არის კონსტანტინე შვანგირაძე.

„არც ერთი ის წევრი, რომელიც აქამდე გვერდით დაუყენებია უგულავას, „ქართული ოცნების“ მოქმედი წევრები არ არიან. უფრო მეტიც, დღეს იცით, რა გააკეთა? გვერდით დაიყენა მათი პარტიის ახალგაზრდული ფრთხის წარმომადგენლები, რომლებიც 2017 წლის არჩევნებშიც მათ ახალგაზრდულში იყვნენ.... კონსტანტინე შვანგირაძე წარმოდგენა არ მაქვს ვინ არის, მაგრამ ამასაც დავაზუსტებ თუ გნებავთ. დარწმუნებული ვარ, იგივე სიტუაცია იქნება, რაც დანარჩენი 60 კაცის შემთხვევაში. წინა შემთხვევაში, გახსოვთ, ალბათ, „პატრიოტთა ალიანსის" კანდიდატი დაიყენა გვერდით და თქვა, რომ ეს ადამიანი გადმოვიდა „ქართული ოცნებიდან". ამ სპექტაკლს აგრძელებს და ყველა წინა თემის გადასაფარად, ცდილობს, რომ ახალი თემა გამოიგონოს მაშინ, როდესაც თავად გაურბიან მათ შორის პარლამენტის წევრები პარტიიდან და ენგრევათ პარტია", აღნიშნა, მამუკა მდინარაძემ „რუსთავი 2"-თან საუბრისას.