„ქართული ოცნების“ მიერ გამოქვეყნებული სოციოლოგიური კვლევის - რომლის მიხედვითაც დამოუკიდებელი და მმართველი პარტიის მიერ მხარდაჭერილი საპრეზიდენტო კანდიდატი სალომე ზურაბიშვილი პირველივე ტურში 53%-ით იგებს - სანდოობას ეჭვქვეშ აყენებს სამაუწყებლო კომპანია „ რუსთავი 2“-ის გენერალური დირექტორი ნიკა გვარამია, რომელიც „ფეისბუქზე“ წერს, რომ „კვლევა გამოცხადდა ყველა დადგენილი წესის დარღვევით“ და მისი ავტორი, ზურაბ ბიგვავა არის „ივანიშვილის კარის სოციოლოგი და ცნობილი ყალბისმქმნელი და აფერისტი. ასე რომ, მის მიმართ ნდობა ნულოვანია“.

გვარამიას განცხადებით, „ყველა რელევანტური კვლევით (და პირველ რიგში EDISON REASERCH-ის, რომელიც ბოინგია ამ ინდუსტრიაში) პირველ ადგილზე დიდი განსხვავებით არის გრიგოლ ვაშაძე, ხოლო ზურაბიშვილი „ჭიდაობს“ მეორე ადგილისთვის დავით ბაქრაძესთან“.

„ქართული ოცნების მიერ გამოცხადებულ ფსიქოპროექტის 53%-ს რაც შეეხება:

1. არ არსებობს და თეორიულად გამორიცხულია იმგვარი ალოკაცია, რომელიც 27%-ს 53%მდე გაზრდის.

2. კვლევა გამოცხადდა ყველა დადგენილი წესის დარღვევით (ან როდის ჩატარდა, ან რამდენი ადამიანი გამოკითხეს და ა.შ.) და უნდა დაჯარიმდეს მისი გამომქვეყნებელი.

3. კომპანია ფსიქოპროექტი არ არის ლიცენზირებული ESOMAR-ის მიერ, ანუ ევროპის კვლევითი ორგანიზაციების საბჭოს მიერ და შესაბამისად არ გააჩნია ხარისხის ნიშანი. მარტივად რომ ვთქვათ, რასაც უნდა იმას დაწერს.

4. ფსიქოპროექტის ხელმძღვანელი ბიგვავა არის ივანიშვილის კარის სოციოლოგი და ცნობილი ყალბისმქმნელი და აფერისტი. ასე რომ, მის მიმართ ნდობა ნულოვანია.

5. ყველა რელევანტური კვლევით (და პირველ რიგში EDISON REASERCH-ის, რომელიც ბოინგია ამ ინდუსტრიაში) პირველ ადგილზე დიდი განსხვავებით არის გრიგოლ ვაშაძე, ხოლო ზურაბიშვილი „ჭიდაობს“ მეორე ადგილისთვის დავით ბაქრაძესთან. ასე რომ, პირველი ტურით მოგება კი არა, საერთოდ მეორე ტურში გადასვლის პრობლემა აქვს.

ასე რომ, მეგობრებო, ციფრი 53% არის მხოლოდ ქართული ოცნების ისტერიული მდგომარეობის და ავადმყოფური ფანტაზიის ნაყოფი.

წყალი არ გაუვა, ხელისუფლებას არჩევნები წაგებული აქვს. ამის გასაფორმებლად მხოლოდ თქვენი არჩევნებზე მისვლაა საჭირო!“- აცხადებს ნიკა გვარამია.