„შენების მოძრაობის“  პრეზიდენტობის კანდიდატმა, დავით უსუფაშვილმა პრეზიდენტ გიორგი მარგველაშვილის საქმიანობა შეაფასა.

უსუფაშვილის თქმით, მარგველაშვილს მძიმე ვითარებაში მოუწია პრეზიდენტობა. მან ბევრი და სწორი რამ გააკეთა, რომ არ შედრკა და  არ გაემთელა სისტემას, მაგრამ ამასობაში ბევრი ძალა და ენერგია შეალია სწორედ ამ ბრძოლას.

უსუფაშვილმა ამ ბრძოლის მიზეზად პრეზიდენტსა და „ქართული ოცნების“ ლიდერებს შორის ინაუგურაციიდან 2-3 კვირაში გაჩენილი კონფლიქტი დაასახელა და განაცხადა, რომ მიუხედავად დაშვებული შეცდომებისა, ყოფილი პრეზიდენტებისგან გაკეთებული საქმეების გაგრძელებას შეეცდება.

„ქართული ანდაზა ამბობს „წინა კაცი უკანასი ხიდიაო” , მე მარგველაშვილის გაკეთებული საქმეების გამრავლებას შევეცდები ისევე, როგორც საქართველოს სხვა პრეზიდენტების- გამსახურდიას, შევარდნაძისა და სააკაშვილის. ყველა მათგანმა ბევრი რამ გააკეთა და ბევრიც შეეშალა. ქვეყანა მაშინ ძლიერდება, როცა სხვის ნაშენებს კი არ ანგრევ და თავიდან იწყებ, არამედ აგრძელებ“,  აცხადებს დავით უსუფაშვილი.

მისივე თქმით, პრეზიდენტად არჩევის შემთხვევაში ავლაბრის რეზიდენციაში საქართველოს ყოფილი პრეზიდენტების პორტრეტების გვერდიგვერდ და თვალსაჩინო ადგილზე გამოფენას გეგმავს.