გაერთიანებული ოპოზიციის ლიდერები ბათუმში მხარდამჭერებს ხვდებიან. შეკრებილ ებს სიტყვით მიმართა პარტია ”ემსახურე საქართველოს” დამფუძნებელმა, მურმან დუმბაძემ, რომელმაც წინა არჩევნები და ხელისუფლების ცვლილების პერიოდი გაიხსენა. მათ შორის 2012 წელი, როდესაც ქვეყანაში ხელისუფლება მშვიდობიანი გზით, არჩევნებით შეიცვალა. მურმან დუმბაძემ სიტყვით გამოსვლის დროს, „ევროპული საქართველოც“ ახსენა და განაცხადა, რომ ეს პარტია ბიძინა ივანიშვილს ეკუთვნის. მურმან დუმბაძე ოპოზიციის გაერთიანების შესახებაც საუბრობს და ამბობს, რომ არჩევნებში მოგება სწორედ რომ გაერთიანებით არის შესაძლებელი.

„2012 წლის პირველ ოქტომბერს, საღამოს, საქართველოს მესამე პრეზიდენტმა, "ნაციონალური მოძრაობის" ლიდერმა მიხეილ სააკაშვილმა აღიარა დამარცხება და ეს იყო ქართული სახელმწიფოს გამარჯვების დღესასწაული. 22 წლის განმავლობაში, ვიდრე დამოუკიდებლობის მოპოვების დღიდან, ვიდრე 2012 წლის 1 ოქტომბრამდე, ეს იყო პირველი შემთხვევა, როცა საქართველოს ამომრჩეველმა საარჩევნო ყუთთან, ხელისუფლების ძალადობრივი ცვლილების ნაცვლად, ხელისუფლება შეცვალა.

2012 წლის 2 ოქტომბრიდან, ძალაუფლება ხელში ჩაიგდო პოლიტიზირებულმა სუს-მა და არაფორმალურმა მმართველმა. 2016 წლის საპარლამენტო არჩევნების შედეგი ის მიზეზიცაა. ჩვენ მივიღეთ გაყალბებული არჩევნების შედეგად 4/5-იანი უმრავლესობა, ჩვენ მივიღეთ საქართველოს პარლამენტში შეტანილი ოპოზიცია, მახინაციებით შეტანილი ოპოზიცია, ვითომ ოპოზიცია და ჩვენ იქვე მივიღეთ საქართველოს პარლამენტის წიაღშივე წარმოშობილი ვითომ ოპოზიცია, სახელით - ევროპული საქართველო და ნომრით 2. არ ენდოთ, ბიძინასია.

ჩვენი მოგება შესაძლებელია მხოლოდ და მხოლოდ დიდი გაერთიანებით და მე ვარ ძალიან მოხარული, რომ 11 პოლიტიკური სუბიექტი განსხვავებული აზრებით, დავჯექით ერთად, მოვილაპარაკეთ და შექმენით ნამდვილი ოპოზიციური გაერთიანება, ერთადერთი პოლიტიკური ძალა - ძალა ერთობაშია“, განაცხადა მურმან დუმბაძემ.