საქართველოს პრემიერ მინისტრმა, მამუკა ბახტაძემ „მწვანე პოლიტიკა - ეკოტრანსპორტი“-ს პრეზენტაციისას განაცხადა, რომ მისი მთავრობა სამგორიდან ლილოს მიმართულებით ახალ მეტროსადგურებს ააშენებს. „პერსპექტივაში ეს დაგვეხმარება რომ რუსთავიც მიბმული იყოს ამ პროექტს“, განაცხადა ბახტაძემ, რომელმაც ახსნა თუ რატომ შეჩერდა შემოვლითი რკინიგზის განხორციელება.

„ჩემი რკინიგზაში მუშაობის პერიოდში სრულიად ობიექტურად მოხდა თბილისის შემოვლითი რკინიგზის პროექტის შეჩერება, ვინაიდან ის ვერანაირ სტანდარტს ვერ პასუხობდაუფრო მეტიც, იყო კონტპროდუქტიული და რეტროგრადული მე ვიტყოდი. თქვენ ვერ ნახავთ ევროპაში ვერც ერთ ქალაქს, სადაც არ არის განვითარებული ყველაზე მწვანე ტრანსპორტი, რკინიგზა. ვერ ნახავთ ვერცერთ ევროპულ ქალაქს, სადაც არ არის ცენტრალური რკინიგზის სადგური. აღნიშნული პროექტი ითვალისწინებდა იმას, რომ ყველაზე მწვანე ტრანსპორტი უნდა გადაგვეტანა ქალაქიდან და მის მაგივრად შეგვექმნა დამატებითი ავტომაგისტრალები ჩვეულებრივი ავტომობილებისთვის. ბუნებრივია, ეს არის სრულიად მიუღებელი.

გარდა ამისა, ძალიან მნიშვნელოვანი საინჟინრო ნაკლოვანებები ჰქონდა ამ პროექტს. ჩვენ გვქონდა საერთაშორისო დასკვნები, რომლის მიხედვითაც, ამ პროექტის დამთავრება არსებული დიზაინით იყო სრულიად მიუღებელი. შესაბამისად, ჩემი მთავარი ხედვა გახლდათ, ჩვენ მოგვეხდინა ის, რაც გააკეთა ბევრმა ევროპულმა ქვეყანამ წარმატებით.

მოგვეხდინა რკინიგზისა და მეტროს ინტეგრირება ყველაზე ეფექტური საშუალებით.... შემოვლითი რკინიგზის ინფრასტრუქტურას ჩვენ გამოვიყენებთ და ავაშენებთ ახალ მეტროსადგურებს სამგორიდან ლილოს მიმართულებით. ეს არის ძალიან მნიშვნელოვანი პროექტი, რომელიც დამატებით სიცოცხლეს მოიტანს ჩვენს დედაქალაქში. ამასთან ერთად, მოგეხსენებათ, რომ თბილისის აგრომელაციაც ვითარდება და პერსპექტივაში, მომავალში ქალაქი რუსთავი შესაბამისი ინფრასტრუქტურით მოვაბათ თბილისის მეტროს. ეს არის მართლაც ისტორიული მნიშვნელობის პროექტი“, განაცხადა მამუკა ბახტაძემ.