პრემიერ მინისტრ მამუკა ბახტაძის განცხადებით, საქართველოში ელექტრომობილების წარმოება იგეგმება. ამის შესახებ მთავრობის მეთაურმა „მწვანე პოლიტიკა - ეკოტრანსპორტი“-ს პრეზენტაციისას განაცხადა.

მამუკა ბახტაძის თქმით, მომდევნო ათი წლის განმავლობაში საქართველოში ტრადიციული ტრანსპორტის 90% ელექტროტრანსპორტით იქნება ჩანაცვლებული.

„საქართველოს მთავრობამ შეიმუშავა გეგმა, რომლის მიხედვითაც, შემდეგი ათი წლის განმავლობაში, საქართველოში მოქმედი ავტოპარკის 90% ჩანაცვლდება ელექტრომობილებით და შესაბამისად, საქართველო იქნება პირველი ქვეყანა, რომელიც ასეთ მოკლე ვადაში ჩაანაცვლებს თავის ავტოპარკს ელექტრომობილებით. ეს არის ძალიან ამბიციური გეგმა, მაგრამ ამავე დროს, ეს გეგმა ძალიან დიდ უპირატესობას მოუტანს საქართველოს და ძალიან დიდ ღირებულებას შესძენს ჩვენს ეკონომიკას.

ძალიან მნიშვნელოვან ფისკალურ სტიმულს მივცემთ ისეთ სალიზინგო სქემების ამუშავებას საქართველოში, რომლის მიხედვითაც, მომხმარებელი შეიძენს ელექტროავტომობილს და ფაქტიურად, იმ ხარჯის ეკონომიით, რასაც მიიღებს საწვავიდან დანაზოგი სახსრების მეშვეობით, 5 წლიან ვადაში გამოისყიდის ავტომობილს, ფაქტიურად დამატებითი ხარჯების გარეშე.

ჩვენ უკვე ძალიან მნიშვნელოვანი უპირატესობა მივეცით ელექტროტრანსპორტს შიდაწვისძრავიან მანქანებთან შედარებით განბაჟება, ფაქტობრივად, გახლავთ ნულოვანი და ნაბიჯ-ნაბიჯ ჩვენ კიდევ უფრო გავზრდით სხვაობას განბაჟების ნაწილში ელექტროტრანსპორტსა და ტრადიციულ ავტომობილებს შორის. ამასთან ერთად, ჩვენ კიდევ უფრო განვავითარებთ ინფრასტრუქტურას, რომელიც კიდევ უფრო დააჩქარებს და ხელს შეუწყობს იმას, რომ უფრო მეტი ადამიანი დაინტერესდეს საქართველოში ელექტროავტომობილების შემოტანით. ჩვენ უკვე ვაწარმოებთ ორ ყველაზე ცნობილ ბრენდთან მოლაპარაკებას, რომ საქართველოში აშენდეს ელექტრომობილების ქარხანა", განაცხადა მთავრობის მეთაურმა პრეზენტაციაზე.