გაერთიანებულმა ოპოზიციამ სატელეფონო ჩანაწერები გაასაჯაროვა და განაცხადა, რომ მმართველი პოლიტიკური ძალა საჯარო მოსამსახურეებზე ზეწოლას ახორციელებს და მათ სალომე ზურაბიშვილისთვის ხმის მიცემას აიძულებს.

„რუსთავი 2"-ის ცნობით, როგორც სატელეფონო ჩანაწერიდან ირკვევა, ჩანაწერის ავტორი სატრანსპორტო კომპანიის თანამშრომლებს, შოთა კარასაშვილსა და სტელა ხაჩატურიანს „ქართული ოცნების" საარჩევნო შტაბის წარმომადგენლის სტატუსით ეცნობა და ეკითხება, მიიღეს თუ არა დავალება სატრანსპორტო კომპანიიდან, რომ საპრეზიდენტო არჩევნებზე უნდა მივიდნენ და ხმა სალომე ზურაბიშვილს მისცენ.

„ერთიან ნაციონალურ მოძრაობაში" აცხადებენ, რომ სატელეფონო ჩანაწერები ადმინისტრაციული რესურსის გამოყენებას ადასტურებს. „ნაციონალური მოძრაობიდან" საკრებულოს დეპუტატი ლევან ხაბეიშვილი ამბობს, რომ საქმეში სისხლის სამართლის დანაშაულის ნიშნები იკვეთება.

„ამ ჩანაწერებიდან ირკვევა, რომ კონკრეტულ სისხლის სამართლის დანაშაულთან გვაქვს საქმე, სადაც საჯარო მოხელეებს დედაქალაქის მაფიოზი მერი კახი კალაძე აიძულებს მათი ნების საწინააღმდეგოდ ხმა მისცენ სალომე ზურაბიშვილს.

ჩანაწერებიდან ნათლად ირკვევა, რომ ამ ადამიანებს აქვთ კონკრეტული დავალება მიღებული იმისთვის, რომ პრეზიდენტად აირჩიონ სალომე ზურაბიშვილი. დედაქალაქის მერს და ცენტრალურ საარჩევნო კომისიას მოვუწოდებ, რომ შეწყვიტონ მოქალაქეებზე ზეწოლა, შეწყვიტონ საჯარო მოხელეებზე ზეწოლა. ასევე, მოვუწოდებ იმ ადამიანებს, ვისზეც ახორციელებენ ზეწოლას, ვისაც სთოხვენ, რომ მათი ოჯახის წევრმა ხმა მისცეს სალომე ზურაბიშვილს  - მოითმინეთ 28 ოქტომბრამდე, დაუქნიეთ თავი, გამოართვით თანხა, მიიღეთ მათი დავალება და 28 ოქტომბერს, როგორც მოგატყუათ „ქართულმა ოცნებამ" თქვენ 2012 წელს, ისევე მოატყუეთ თქვენც", განაცხადა ლევან ხაბეიშვილმა.