გაერთიანებული ოპოზიციის მიერ სატელეფონო საუბრების გავრცელებას თბილისის მერი კახა კალაძე გამოეხმაურა. მერი ოპოზიციის ბრალდებას, რომ მმართველი პოლიტიკური გუნდი ადმინისტრაციულ რესურსს იყენებს და ამომრჩეველზე ზეწოლას ახდენს, ხუმრობით პასუხობს.

კახა კალაძემ ოპოზიციის მიერ გავრცელებული სატელეფონო ჩანაწერების საპასუხოდ, ჟურნალისტებს წარუდგინა სატელეფონო ჩანაწერი, რომელშიც „ჩანაწერის ავტორი" მოსაუბრეს სატრანსპორტო კომპანიის წარმომადგენლის სტატუსით ეცნობა და ეკითხა, მიიღო თუ არა დავალება, თუ ვის უნდა მისცეს ხმა არჩევნებში.

„მეც მაქვს ჩანაწერი, რომელიც მოვიპოვე და მგონია, რომ აუცილებელია, გამოძიება დაიწყოს, ახლა მოგასმენინებთ ამ ჩანაწერს:

- გიორგი ხართ ხომ?

- დიახ, გისმენთ,

- სატრანსპორტო კომპანიიდან გაწუხებთ, თქვენ 2017 წლის ადგილობრივი თვითმმართველობის არჩევნებზე ხომ იყავით მოსულები?

- ვიყავით.

- ოჯახით ხომ?

- კი, ნათესავები წამოვიყვანეთ.

- წელსაც ხომ აპირებთ მოსვლას?

- რა თქმა უნდა, მთელი ოჯახით მოვდივართ, ნათესავებიც მომყავს.

- ხმას ვის აძლევთ, გაქვთ ხომ მითითება მიღებული?

- ხმას ვაძლევ „ნაციონალურ მოძრაობას“, ვინც დაგვაკარგინა ქვეყნის 20%.

- ძალიან კარგი.

„ნაციონალურ მოძრაობას“ დავალება გაუცია სატრანსპორტო კომპანიაში, რომ „ნაციონალურ მოძრაობას“ უნდა მისცენ ხმა, როგორც 2017 წელს. ალბათ, ეს არის ძალიან ცუდი ფაქტი, გამოყენება ადმინისტრაციული რესურსის, ოღონდ ოპოზიციის მხრიდან. ეს ძალიან ცუდია და საარჩევნო გარემოს აზიანებს. მგონი, დამაკმაყოფილებელი იყო ჩემი პასუხი", განაცხადა კახა კალაძემ ჟურნალისტებთან საუბრისას.

გაერთიანებულმა ოპოზიციამ დღეს სატელეფონო ჩანაწერები გაასაჯაროვა და განაცხადა, რომ მმართველი პოლიტიკური ძალა საჯარო მოსამსახურეებზე ზეწოლას ახორციელებს და მათ სალომე ზურაბიშვილისთვის ხმის მიცემას აიძულებს.

„რუსთავი 2"-ის ცნობით, როგორც სატელეფონო ჩანაწერიდან ირკვევა, ჩანაწერის ავტორი სატრანსპორტო კომპანიის თანამშრომლებს, შოთა კარასაშვილსა და სტელა ხაჩატურიანს „ქართული ოცნების" საარჩევნო შტაბის წარმომადგენლის სტატუსით ეცნობა და ეკითხება, მიიღეს თუ არა დავალება სატრანსპორტო კომპანიიდან, რომ საპრეზიდენტო არჩევნებზე უნდა მივიდნენ და ხმა სალომე ზურაბიშვილს მისცენ.